Pisomi 57 - U TIENU MAAMA TILI 2013

N miadi tanpoli Tienu todima

¹ Bi yanyinba yudaano yani siiga yanbu, ban yiini yaabu leni ban yi yaa yanbu: «Da bolini» yaa nialu. Davidi yanbu. Li tiadi Davidi n den sani ki kua ku joatanlongu nni ki baa cia Sayuli.

² Gbadi n po mi ninñima, U Tienu, gbadi n po mi ninñima, Kelima n cua ki wuoni a kani. N wuoni a fiabi soangu nni, Hali mi yebiadima n baa pendi yaa yogunu.

³ N kpaani ki miadi mi todima Tanpoli Badiciamo U Tienu, Wani yaa Tienu n baa ŋanbi n po Li bonla kuli yeni.

⁴ Hali tanpoli, o baa soani n po mi faabima. N yibali n yagini n yama yaa yogunu, U Tienu baa soani o ŋanbili leni o moamoani. Joma

⁵ N ye i yangbanli siiga, Ki dua yaaba n ŋmani bi nisaaliba nintuali. Bi ñina tie nani a kpaana leni i piemi yeni. Bi landi mo tie nani mu jugisiemanmu yeni.

⁶ U Tienu, fii ki sedi ti tawadi nni, A kpiagidi n doagidi bonŋanla Ki tinga nni kuli.

⁷ Bi den dia ku diagu n sanu nni. N den tiibi kelima li paboanli po. Bi den gbini ku buogu n nintuali. Ama bani bi ba n go den baa lienni. Joma

⁸ N pali pa, U Tienu, n pali pa! N baa yiini, n baa yiini ki pagi a!

⁹ N den yedi n yuli: fundi! Yimo n fundi, n gogidibiga leni n gogidiciangu. N baa fundi u tiŋaafaanu.

¹⁰ N Diedo, n baa pagi a bi niba siiga! N baa yiini ki pagi a i nilanbuoli siiga,

¹¹ Kelima a ŋanbili ban pundi hali tanpoli. A moamoani mo pundi hali ti tawadi.

¹² Fii ki sedi ti tawadi nni, A kpiagidi mo n doagidi bonŋanla Ki tinga nni kuli.