Pisomi 56 - U TIENU MAAMA TILI 2013

Ti dugidi jaandi

¹ Bi yanyinba yudaano yani siiga yanbu, ban yiini yaabu nani foagima kpaajiega yaaga n jagi i ticiandi po. Li maadi Filisiti yaaba n den cuo Davidi Gati diema nni yaa maame.

² U Tienu, gbadi n po mi ninñima, Kelima bi niba yagini n yama. Daali kuli bi togidi nni bu toabu, Ki mabindi nni.

³ Daali kuli n yibalinba yagini n yama. U Tienu U Paaciamu Daano, Yaaba n cidi nni bu toabu yabi.

⁴ Min ye leni i jeje yaa daali, N dugi a po.

⁵ N pagi U Tienu maama, N dugi U Tienu po, mii jie liba kuli. Bi nisaaliba baa fidi ki tieni nni be?

⁶ Daali kuli bi yagini n yama leni bi maama, Bi li jagi n po yaala n bia bebe.

⁷ Bi wuo ki diidi ki kpaagi Min tiendi yaala kuli po. Bi diidi n fuuli bonŋanla, Kelima bi bua ki ñani n miali.

⁸ Teni ban le fala bi tuongunda po. A pabienli nni, pua ki guli laa niba.

⁹ A coadi n lianliantaabuona, Ki kuodi n nunsiidi mo a dayuagu nni. Naani n nunsiidi yeni kuli ki ye a tili nni?

¹⁰ N yaa kpaani ki mia ŋa yaa daali, N yibalinba kuli baa suli puoli. N bani ke U Tienu ye n yaa po yo.

¹¹ N pagi U Tienu kelima Wan yedi yaa maama po. N pagi wani o Diedo Kelima laa maama po.

¹² N dugi o Diedo po, mii go jie liba. Bi nisaaliba baa fidi ki tieni nni be?

¹³ U Tienu, n baa kuani Min den niani a yaa ñoaniani, Ki padi a po i tuondi pada,

¹⁴ Kelima a gaa n miali, Ki faabi nni leni mi kuuma. A kubi n taana ke min da tuudi ki baa, Ke min yaa cuoni a nintuali Li miali yenma nni.