Pisomi 44 - U TIENU MAAMA TILI 2013

Pisomi 44 Ama a luni ti

¹ Bi yanyinba yudaano yani siiga yanbu. Kore buolu yanbu.

² U Tienu, ti den gbadi leni ti tuba, Ti baanba mo go den togidi ti, Ŋan den soani yaa tuonli bi yogunu, Hali bi nikpiaba yaa yogunu nni.

³ A den pua ki deli i nilanbuoli, Ki bua ki teni bi diema n diadi. A den fie i nilanbuoli tinmu, Ki teni ke bi kali mu niinni.

⁴ Bi jama bu toabu nni Ka teni ke bi diedi mi diema. Bi gbanmanu mo ka teni ke bi paadi, Ama li den tie a jienu, A buagu leni a nunga yenma N den tieni laa bonla, Kelima a pali den mani bi po.

⁵ Fini n tie n bado U Tienu, Ñani a ñoamabonli Jakob buolu baa faabi!

⁶ A yaa po ti baa paadi ti yibalinba. A yeli po, ti baa ŋmaa ki midi Yaaba n fii ki sedi ti po,

⁷ Kelima n naa dugi n dabanli po ka, N jugisiega mo ka baa ciadi nni.

⁸ Fini n faabi ti ti yibalinba nuu nni, Ki go wali yaaba n nani ti i fe.

⁹ Daali kuli ti kpiagidi U Tienu yeli. Ti pagi a yeli yaa yogu n tuu yaa yogu.

¹⁰ Ba leni lani kuli a luni ti, Ki teni ke ti laa i fe. Ŋaa go ña leni ti toagola.

¹¹ A teni ke ti sudi puoli yibali nintuali, Yaaba n nani ti mo fagi ki kpabidi ti cain.

¹² A taa ti ki teni, Nani ban baa kodi yaa yandi yeni. A yadi yadi ti i nilanbuoli siiga.

¹³ A kuadi a niba fanma fanma po. Ŋaa kuadi ba ki ŋmani puu.

¹⁴ A teni ke ti tua i fe bonla, Ti yieninlieba po, Ki tua li ñuali leni ti laadi bonla, Ti kuantalieba po.

¹⁵ A teni ke ti tua li mañuali bonla I nilanbuoli po. Bi niba miani ti po bi ñoana ki ñuadi ti.

¹⁶ Daali kuli n fe baa ki ye leni nni, N wuu i fe,

¹⁷ Kelima yua n fiagidi nni, Ki go yualiti nni maama po Leni n yibali yua n mabindi nni ñuali po.

¹⁸ Laa bonla kuli tieni ti, Ama ti naa sundi a po, Tii miidi a ŋantaado.

¹⁹ Ti pala mo naa lebidi ki ŋaa ŋa, Ti taana mo naa jadi ki ŋaa a sanu,

²⁰ Ama a mudi ti, Ki taa ti ki luni i tanboe n ye naani, Ki teni ke mi kuuma jinjingu libini ti.

²¹ Ti yaa den sundi ti Tienu n tie yua, Ki ŋoadi i nilanbuli,

²² Naani U Tienu yua n bani li pali nni ŋasiili, Kan bi bandi la?

²³ A yaa po n teni ke bi kpaani ti daali kuli, Ki nua ti nani ban baa kodi yaa pe yeni.

²⁴ O Diedo, fii! Be yaa po ke a goa? Fundi, da lu ti yaa yogunu kuli po.

²⁵ Be yaa po yo ke a buli ti a nunga? Be yaa po yo ke a sundi ti fala Leni tin ye leni yaa mabinga?

²⁶ Li paboanli paadi ti, Hali ke ti bilini mi tama nni.

²⁷ O Diedo, fii ki cua ki todi ti, Ki daa ki faabi ti kelima a ŋanbili po.