Pisomi 41 - U TIENU MAAMA TILI 2013

Pisomi 41 Ban wangi yua fala jaandi

¹ Bi yanyinba yudaano yanbu. Davidi yanbu.

² Li pamanli ye leni yua n tiadi a tadima po. Fala yaa ŋmaa o yaa daali, O Diedo baa faabi o.

³ O Diedo baa kubi o ki teni wan yaa ye. O yema mani o po ki tinga nni. A kan teni o yibalinba n tieni o Ban bua yaala.

⁴ O fala duanu po, o Diedo baa kubi o, Ki yaa paagidi o o yiani kuli po,

⁵ N yedi: «O Diedo, gbadi n po Mi ninñima ki paagi nni. Moamoani, n pia i tagili a po.»

⁶ N yibalinba ja n po li jenbiadili ki tua: «O baa kpe u laa yogunu yo o yeli n bodi?»

⁷ Bi siiga yua cua ki baa le nni, O yen maadi mafanma bebe, Ki kpaagi mi biadima po o pali nni. O yaa ñani, o li baa maadi u sanu nne.

⁸ Yaaba n nani nni kuli taani ki soabidi, Ki maadi n maama, Ki jagi n po yaala n bia.

⁹ Bi tua: «O yianu ne kan cedi o. O kan fii o duanu ne po.»

¹⁰ Ba n danli min den dugi yua yaa po, Mini leni yua n den taagi ki di, Lugidi nni u danbu.

¹¹ Fini o Diedo, gbadi n po mi ninñima. Fiini nni min tuu ba li panli.

¹² Diidi lan baa gaa maama Min bandi ke a bua nni: Ŋan da tuo n yibali n mangi o pali Kelima o paadi nni po.

¹³ A kubi nni n papienli nni. A teni ke n ye a nintuali yogunu kuli.

¹⁴ O Diedo Isidayeli Tienu n baa ti pagidi, Yaa yogu n tuu yaa yogu! Amina, Amina!