Pisomi 40 - U TIENU MAAMA TILI 2013

Pisomi 40 Ti pagidi yanbu U Tienu po

¹ Bi yanyinba yudaano yani siiga yanbu. Davidi yanbu.

² N den bili n dugidi o Diedo kani, Ke o den biini ki noanli nni, Ki cengi n miabu.

³ O faabi nni leni mi kuuma buogu. O ñani nni ti moamoadi nni, Ki sieni nni ku tangu po, Ki teni ke n ŋmaa ki bugini.

⁴ O kuani n ñoabu nni bu yanpanbu, Ti pagidi yanbu ti Tienu po. Yaaba n baa le ba baa baa li fangili, Ki bili bi dugidi o Diedo kani.

⁵ Li pamanli ye leni yaa nilo N bili o dugidi o Diedo kani, Ki naa lebidi ki ŋua bi japaadanba Leni bi tuofaadanba.

⁶ O Diedo n Tienu, A pugidi a bancianma Leni a yanjagiŋama ti po. Liba kuli ki da leni a. N bi bua ki kpaani ki doagidi la, Ama li yabi ki cie min baa fidi Ki coadi yaala.

⁷ Ŋaa bua pada, Ŋaa bua paabu padili, A teni ke n bandi laa bonla. Ŋaa mia nni padijuukaali Bi tuonbiadi sugili padili ka.

⁸ Lani yaa po, n den yedi: «Diidi n kpendi Leni li tili yaali n diani n po.»

⁹ N Tienu n bua ki tieni a yanbuama, Ki kubi a bali maama mo Hali n pali tugu nni.

¹⁰ Li nitaancianli nni n baa yaa wangi A teginma laabaaliŋamo. O Diedo, a bani ke n kan fidi ki yaa ŋmini.

¹¹ Mii wuoni a teginma n pali nni. N maadi a moamoani Leni a faabima maama. Mii wuoni a ŋanma Leni a moamoani li nitaancianli nni.

¹² Fini o Diedo, a kan yie n po a ninñingbadima. A ŋanbili leni a moamoani Baa kubi nni yaa yogunu kuli.

¹³ Mi yebiadima buoli Yii n ki pia coali taani ki ŋmaa nni. N tagili ŋua ki deli nni. N kan fidi ki noanli yi. I yabi ki cie n yuli po yudi N papaali kuli bodi.

¹⁴ O Diedo, cua ki faabi nni, Jaligi ki cua ki todi nni.

¹⁵ Teni yaaba n miadi n kuuma kuli N fiagi, ki le i fe. Ban guani puoli, Bi yula n tibini i fe po, Bani yaaba n miadi n po mi yebiadima yeni.

¹⁶ Teni ban fiagi hali lan wudi ba, Bani yaaba n laa nni ti laadi yeni.

¹⁷ Ama yaaba n lingi a kuli, N yaa ye leni li pamanli a po. Yaaba n bua a faabima n yaa tua yogunu kuli: «O Diedo n baa ti pagidi!»

¹⁸ Mini, n tie ninñinnilo ki go luo, Ama o Diedo tiani n po. Fini n tie n todika leni faabika, Fini n Tienu, da guudi lan waagi ki cua.