Pisomi 39 - U TIENU MAAMA TILI 2013

Pisomi 39 O nisaalo miali koabi

¹ Bi yanyinba yudaano leni Jedutuni yani siiga yanbu. Davidi yanbu.

² N den tua: «N baa yaa faami n bontienkaala po, Ke n lanbu n da ti kuani nni ti tuonbiadi nni. N baa kpibini n ñoabu ki biaga, O nibiado n ye n nintuali yaa yogunu kuli.»

³ N den ŋmini suo, Ki den muubi n ñoabu, Ba ke n ye leni fala. Ama n loma den kandi.

⁴ N pali den beni, N dunli den fuli nani u mu yeni. Lani n den ti maadi ki yedi:

⁵ O Diedo waani nni n miali gbenma Leni n miali dana banlu, Teni min bandi n tadingu n da maama.

⁶ A teni ke n dana foaginu tie nubadiyaagu, N miali dana foaginu mo, Ki da liba a nintuali. O nisaalo leni o paalu kuli tie fawaama bebe. Joma

⁷ O nisaalo yen goadi Nani ku jinjingu yeni ki lengidi, Ama o li tie bonpendikaala bebe. O baadi ŋalimani ki dogindi, Ama o naa bani yua n baa ti diedi la.

⁸ Yeni mo daa, o Diedo n dugidi go tie tile? Fini n tie min dugi yua yaa po.

⁹ Faabi nni leni n tuonbiadi kuli. Da tuo o yanluodaano n yaa fiagidi nni.

¹⁰ N ŋmini suo, n kan yaadi n ñoabu, Kelima fini n tieni nni laa bonla.

¹¹ Cedi ki da go pua nni. N tadigi cain kelima a puapuali po.

¹² A waani o nisaalo fala o tagili po, Ki tundi o. A biidi o bonbuadimoanla kuli, Nani ki kudiga yeni. O nisaalo li tie fawaama bebe yo. Joma

¹³ Cengi n jaandi, o Diedo! Diadi a tubili ki cengi n miabu, Da ŋmini, n yaa buudi yaa yogunu, Kelima n tie caano a kani. N tie yaa nilo n ye, U yogunu waamu bebe po ki tinga nni, Nani n yaajanba yeni.

¹⁴ Buli a nunga ki da diidi nni, Yeni n tie n nunbima n yendi, Hali ke n daa gedi ki kan go guani.