Pisomi 36 - U TIENU MAAMA TILI 2013

Pisomi 36 O Diedo, a yaa kani n pia li miali ñinbunli

¹ Bi yanyinba yudaano yani siiga yanbu. O Diedo naacemo Davidi yanbu.

² O nibiado yiema ña hali o pali tugu nni. Waa nua wan baa yaa fangi U Tienu yaala yaa po,

³ Kelima o boandi o yuli Ki naa nua o tagili, ki baa yie yi.

⁴ Faama leni janbi n ña o ñoabu nni. Yaala n ŋani tienma ki tie o po puu!

⁵ O duanu nni, o jagi yaala n bia. O se yaa sanu n ki tiegi nni. Waa yiedi yaala n bia.

⁶ O Diedo, a ŋanbili pundi hali tanpoli. A moamoani mo pundi hali ti tawadi nni.

⁷ A teginma kpedi Nani a juana yeni. A buudi mo ñua nani u kulu yeni. O Diedo, a faabidi bi niba leni ti yandi.

⁸ Fini n Tienu, a ŋanbili pia mayuli hali boncianla. Bi nisaaliba baa sani ki wuoni a fiabi nni.

⁹ Bi dini a diegu nni jemanma ki guo. A teni ke bi ñu a ŋanbili kpenu kani.

¹⁰ Li miali kuli ña a yaa kane. A yaa yenma po yo, Ke ti nua mi yenma.

¹¹ Teni a ŋanbili n pundi yaaba n bani a, A teginma mo n pundi yaa pala n tiegi.

¹² O japaadaano n da pundi n kani, Bi nibiadiba mo n da fidi ki deli nni!

¹³ Yaaba n tiendi yaala n ki dagidi, Ŋmadi ki baali a nintuali ki kan go fii mo.