Pisomi 34 - U TIENU MAAMA TILI 2013

Pisomi 34 O Diedo faabi nni leni n jeje kuli

¹ Davidi yanbu. Li tie wan den tieni Abimeleki kani yaa yogunu nani ke o gaadi yeni, ke Abimeleki deli o ke o sani ki maadi yaa maama.

² N baa yaa pagi o Diedo yogunu kuli, O pagidi mo baa yaa ye n ñoabu nni.

³ N baa yaa kpiagidi n yuli o Diedo nni, Bi yumiindanba mo n cengi Ki mangi bi pala.

⁴ Taani mani leni nni tin pagi o Diedo. Tin taani ki kpiagi o yeli.

⁵ N lingi o Diedo ke o guani n po, Ki faabi nni leni n jeje kuli.

⁶ Yua n yaadi ki noanli o kuli Pali yen mangi, o kan tibini kelima i fe po.

⁷ O ninñinnilo yaa mua, o Diedo gba. O baa faabi o leni o wan ye Leni yaa paboanli buolu kuli.

⁸ O Diedo maleki guu yaaba n fangi o kuli, Ki yen faabidi ba.

⁹ Leni mani ki bandi o Diedo n mani maama! Li pamanli ye leni yua n cua ki wuoni o kani!

¹⁰ Fangi mani o Diedo, Yinba o nigagidiŋanba, Kelima puu kuli ki poadi yaaba n fangi o.

¹¹ A yangbanbila bani mi koma n tie yaala. Ama yaaba n lingi o Diedo, Kan luo bonŋanliba kuli.

¹² N bijaba, cua mani ki cengi nni! N baa bangi yi o Diedo fangili.

¹³ O laa nilo n bua li miali, Ki bua li miafoagili leni mi yemanma?

¹⁴ Wan kubi o lanbu leni mi biadima, Ki kubi o ñoacuuna mo leni i boandi.

¹⁵ Foagidi leni mi biadima Ki yaa tiendi yaala n ŋani. Lingi mi yanduanma, ki yaa ŋua ma.

¹⁶ O Diedo nuni nua bi niteginkaaba, O tuba mo cengi bi kuudi.

¹⁷ O Diedo fii ki se yaaba N tiendi mi biadima po, Ki teni ke bi kan go tiadi bi po Ki tinga nni.

¹⁸ Bi niteginkaaba yaa kuudi, O Diedo gba. O yen faabi ba leni bi paboanli kuli.

¹⁹ O Diedo ye leni yaaba yaa jigi n cie, O faabidi yaaba yaa yama n paagi.

²⁰ Mi yebiadima yen fidi ki ŋmaa o niteginka, Ama o Diedo yen faabi o.

²¹ O kubi o kpaba kuli, Ba kpabiyenli kan kua.

²² Mi yebiadima kpaani o nibiado. Yaaba n nani o niteginka Baa kua ti buudi cuonu nni.

²³ O Diedo faabidi o naacenba miana. Yaaba n sani ki wuoni o kani kuli, Cuonu ki ye bi po.