Pisomi 32 - U TIENU MAAMA TILI 2013Pisomi 32 Yua n baa sugili pamanli 1 Davidi yanbu. 1 Davidi yanbu. Li pamanli ye leni U Tienu n ñani Yua yaa tagili, Ki puni o o tuonbiadi sugili! 2 Li pamanli ye leni o Diedo, N ki go coadi yua yaa tagili, Ke o yantiali mo ki pia boandiba! 3 Min den ŋmini, Kaa tuo ke n pia tuonbiadi, N kpaba kuli den co yo nani u mu yeni, Ke n duni yogunu kuli, 4 Kelima u yensiinu leni ku ñiagu kuli, A nuu den pua nni. N gbanandi den fuagi Nani ku tontongu n gbadi yua yeni. Joma 5 N waani a n tuonbiadi, Mii wuoni a n tagili, N yedi: «N baa waani o Diedo n tagili.» Amo ñani n tuonbiadi tagili. Joma. 6 Nidugika kuli n jaandi a Li yogunu yaa pundi. Ba mi ñima yaa gbie ki kandi, Mi kan milini yaaba n ŋua o Diedo. 7 A tie n po wuonkaanu ki kubi nni, Ki faabidi nni leni li paboanli. A teni ke mi faabima yani lindi nni. Joma. 8 N baa bangi a, Ki waani a ŋan baa tagini yaa sanu. N baa tundi a ki yaa nua ŋa ki guu ŋa. 9 Yin da tie mani nani o taamo, Bi o buomo, bani yaaba n ki pia yama yeni. Bi kpibindi ba mu biamu leni ti kpadi, Ki baa gobidi ba. Lani, yaala n bia kan nandi a. 10 O nibiado fala yabi, Ama o Diedo ŋanma Baa lindi yua n dugi o po. 11 Bi niteginkaaba, mangi mani Yi pala o Diedo po! Yaa kpaani mani li pamancianli kpaani, Yinba yaaba yaa pala n tiegi o Candaano po kuli. |
Gulmancema Protestant Bible © Bible Society of Burkina Faso, 2013.
Bible Society of Burkina Faso