Pisomi 31 - U TIENU MAAMA TILI 2013

Pisomi 31 O Diedo, fini n kubi nni

¹ Bi yanyinba yudaano yani siiga yanbu. Davidi yanbu.

² O Diedo, n sani ki wuoni a yaa kane, Da teni min fiagi! Faabi nni kelima a teginma po!

³ Diadi a tubili ki cengi nni! Jaligi ki faabi nni! Tua n po tanwuonkaanu leni kaanpaalu. Faabi nni!

⁴ Faabi nni kelima a tie n tangu Leni n kaanpaalu. A yeli po, a baa yaa gobidi nni, ki cangi nni.

⁵ A baa faabi nni leni ban dia nni yaa diagu, Kelima fini n guu nni.

⁶ N teni miali a nuu nni. O Diedo i moamoani Tienu, A faabi nni.

⁷ N nani yaaba n taa bi yula Ki puni i buli, yini yii n ki pia fuoma. Ama mini wani, n dugi o Diedo po yo.

⁸ A ŋanbili baa teni Min yaa ye leni li pamankandikaali, Kelima a nua min ye leni yaa fala. A bani min ye leni yaa yanbani.

⁹ A kan taa nni ki teni yibalinba. A teni ke n cuoni ki gaani Leni mi yanduanma.

¹⁰ Gbadi n po mi ninñima, fini o Diedo, Kelima n ye leni li paboanli. N nunga, n naano leni n gbanandi Kuli tadigi kelima li paboanli po.

¹¹ N miali gbeni mi funfunma nni, N bina mo gbeni li dunli nni. N fidu gbeni kelima n tuonbiadi po, N kpaba mo yoaligi.

¹² N koanginkaaba teni ke n ye Leni i fe n yieninlieba kani, Ki go tie i jeje bonla n danlinba po. Yaaba n laa nni u sanu nni Mo sani ki foagidi leni nni.

¹³ Bi niba sundi n po nani o tinkpilo yeni. N tie nani ti baadi.

¹⁴ N gbadi ku niligu mabiadima. Ti jawaandi boncianla kubi nni, Bi juogidi ki fii ki sedi n po, Ki bogidi ki bua ki ñani n miali.

¹⁵ Ama mini wani, N dugi fini o Diedo po yo. N yedi: «Fini n tie n Tienu.»

¹⁶ N yema kuli ye a nuu nni. Faabi nni n yibalinba Leni yaaba n wangi nni fala nuu nni.

¹⁷ Mangi a nunga mini a naacemo po, Ki faabi nni kelima a ŋanbili po.

¹⁸ O Diedo min kpaani ki miadi a todima yeni, Da teni min fiagi. Teni bi nibiadiba yeni wani n le i fe. Teni ban kpe ki bodi cain.

¹⁹ Teni yaa ñoana n pua mi faama Yeni kuli n muu. Ŋani ya n maadi leni ti japaadi Ki sugidi o niteginka ki go fali o yeni.

²⁰ O Diedo, a ŋanbili yabi hali Boncianla yaaba n fangi a po! A doagidi li bi niba nintuali, Yaaba n sani ki wuoni a kani po.

²¹ A yen wuoni ba a kani, Ki gaa ba leni bi nisaaliba ñoana. A yen wuoni ba naankani Ke bi nisaaliba ñoana kan nandi ba.

²² O Diedo yeli n baa ti pagidi, Kelima o doagidi n po o ŋanbili, Yaa dogu yaa yema n pa nni.

²³ N yama den yagini hali yaala Ke n den yedi: «Bi deli ki ñani nni a nintuali n yeni.» Ama a gbadi n nialu min kpaani, Ki miadi a yaa yogunu.

²⁴ Bua mani o Diedo, yinba o ŋoadikaaba kuli. O Diedo kubi yaaba n dugi o po. Ama bi japaadanba wani, O yen waani ba fala.

²⁵ Yinba yaaba n dugi o Diedo po kuli, Paagi mani yi pala, ki go paagi yiba mo!