Pisomi 30 - U TIENU MAAMA TILI 2013

Pisomi 30 O Diedo n guani ki puni nni li miali

¹ U Tienu diegu gagidima yogunu yanbu. Davidi yaabu.

² N pagi a o Diedo kelima a faabi nni. Ŋaa tuo ke n yibalinba n mangi bi pala n po.

³ O Diedo n Tienu, n kpaani ki mia ŋa, Ke a paagi nni.

⁴ O Diedo, a teni ke n naano ñani Bi tinkpiba diema nni. A teni ke n ye naani n foagidi Leni yaaba n ji mi kuuma buogu nni.

⁵ Yinba o Diedo ŋoadikaaba, Yiini mani ki pagi o yeli. Kpiagi mani o yegagidikaali.

⁶ Kelima o pabienli baa waagi U yogunu waamu bebe po. Ama o ŋanbili wani Baa waagi yaa yogunu kuli po. A bubula ye leni ti ku ñiagu, Ama ku tiŋaagu li pamanli kpaani Baa cua ki yaa ye leni ti.

⁷ Min den ye leni mi yanduanma, N den tua n yama nni: «N kan ŋmadi ki baa abada.»

⁸ O Diedo, a ŋanbili po, A teni ke n se ki pa nani li juali yeni. Ŋan den buli a nunga, n yama den yagi.

⁹ O Diedo, n den kpaani ki mia ŋa. N den jaandi ki mia o Diedo.

¹⁰ A yaa wuli n soama, Li baa ŋanbi a po be? N yaa jiidi mi kuuma buogu nni, Li baa todi a be? Naani mi tama baa kpiagi a? Naani mi baa fidi ki togidi a ŋanbili?

¹¹ O Diedo, gbadi n po mi ninñima. O Diedo, tua n todika.

¹² A teni ke n paboanli kpandi ki tua pamanli. A landi nni n paboanli tiadi, Ki lani nni ti jaantiadi.

¹³ Teni min yiini ki kpiagi a yeli ki da ŋmini. O Diedo n Tienu, N baa yaa kpiagidi a yaa yogunu kuli.