Pisomi 29 - U TIENU MAAMA TILI 2013

Pisomi 29 O Diedo nialu

1 Davidi yanbu.

¹ Davidi yanbu. Yinba U Tienu bila, teni mani Li Miali Diedo, Teni mani o Diedo ti kpiagidi leni u paalu!

² Teni mani o Diedo o yeli kpiagidi. Gbaani mani ki kpiagi o leni yaa tiadi n gagidi.

³ O Diedo nialu tuodi u ñingbanu po, U Tienu yua n die ti kpiagidi teni Ke ki taaga duni. O Diedo n die mi ñincianma.

⁴ O Diedo nialu pia u paalu. O Diedo nialu pia li bali.

⁵ O Diedo nialu teni ke sediri tiidi koa. O Diedo teni ke Liban diema sediri tiidi koa.

⁶ O teni ke i tiidi yeni yugi Ki ciini nani ki naabiga yeni. O teni ke Sidiyono leni Liban juana Yugi ki ciini nani li moanaatonbili yeni.

⁷ O Diedo nialu teni ke i tañigi ña.

⁸ O Diedo nialu teni ke mi fanpienma digibi. O Diedo teni ke Kadesi fanpienma digibi.

⁹ O Diedo nialu teni ke i piali mali bi bila, Ki teni ke li fuali tiidi bonla kuli suodi. O Diedo diegu nni li bonla kuli Kpaani ki kpiagidi o.

¹⁰ O Diedo den kaa o gbandi po, Ki tabolinkaaga yogunu. O Diedo tie bado ki kaa ti gbandi po, Yaa yogu n tuu yaa yogu.

¹¹ O Diedo baa pa o niba u paalu, O Diedo baa seligi o niba, Ki pa ba mi yanduanma.