Pisomi 27 - U TIENU MAAMA TILI 2013

Pisomi 27 O Diedo kani, jeje ki ye

1 Davidi yanbu.

¹ Davidi yanbu. O Diedo n tie n yenma leni n faabima. N go baa yaa jie ŋme yo? O Diedo n tie n miali wuonkaanu. N go baa yaa digibi ŋme yaa kane? O Diedo n tie yua n kubi n miali, Mii bangi liba kuli po.

² Mi biadima danba yaa nagidi nni, Ki bua ki je nni, Bani n yibalinba leni n koanginkaaba, Bi baa yaa tuudi ki go ŋmadi ki baali.

³ Ba toagoli yaa fii ki sedi n po, N pali kan yaa pia yanbaniba kuli. Ba niba yaa fii n po leni bu toabu, N baa yaa baa ki pia ti dugidi.

⁴ N miadi o Diedo bonyenla, Min bua yaala ke li moani n nuni. Lani n tie ki yaa ye o Diedo diegu nni, N miali yema nni kuli, Ki fidi ki ñuadi o Diedo ŋanciamu, Ki go fidi ki ñuadi o diegu.

⁵ Fala daali yaa cua, O baa gaa nni o diegu nni. O baa wuoni nni o gbandieli nni, Ki duoni nni min yaa ye ku tangu po.

⁶ N yuli caadi n yibalinba, Yaaba n gaani ki lindi nni kuli. N baa yaa padi o gbandieli nni Yaa pada n tie ti pagidi pada. N baa yiini ki go pagi o Diedo!

⁷ O Diedo, cengi n nialu! N jaandi ki miadi fine! Gbadi n ninñima ki gaa n jaandi.

⁸ N kpaagi a maama po, Yaama n yedi: «Lingi mani n nunga!» O Diedo, n lingi a yaa nunge.

⁹ Da buli nni a nunga, Ki da bieni a pali ki deli, Mini a naacemo. Fini n tie n todika, Da foagidi n kani, da ŋaa nni, Fini U Tienu yua n tie n faabima.

¹⁰ N naa leni n baa luni nni. Ama o Diedo wani baa gaa nni.

¹¹ O Diedo, bangi nni a sanu, Gobidi nni mi teginma sanu nni, Kelima yaaba n fii ki sedi n po yaa po.

¹² Da teni n yibalinba n tieni nni Ban bua yaala, Kelima bi siedifaadanba fii Ki sedi n po leni ku tugumoangu.

¹³ N daani cain ke n baa le o Diedo ŋanbili Bi nifuodiba n ye yaa tinga nni.

¹⁴ Dugi o Diedo po! Paagi aba, ki paagi a pali! Dugi o Diedo po!