Pisomi 25 - U TIENU MAAMA TILI 2013

Pisomi 25 Ti tuonbiadi daano sugilimiabu

1 Davidi yanbu.

¹ Davidi yanbu. N pegidi ki nua fine o Diedo!

² N Tienu n dugi a yaa po yo. Da teni min le i fe! N yibalinba n da mangi bi pala n po!

³ Yaaba n dugi a po kuli kan le fe. I fe baa cuo yaaba n janbidi a fanma fanma.

⁴ O Diedo, teni min bandi a sanbila. Bangi nni a sani.

⁵ Teni min yaa cuoni a moamoani nni, Bangi nni yaala n tiegi, Kelima a tie U Tienu yua faabi nni. N dugi a yaa po yo daali kuli.

⁶ O Diedo, tiadi a ninñingbadima Leni a ŋanbili po, Kelima hali yaa yogu, laa bonla den ye.

⁷ Ŋan da tiadi n panma nni tuonbiadi Leni n panma nni yiema. Tiadi n po kelima a ŋanbili po, Fini o Diedo yua n pia ti bulicindi.

⁸ O Diedo ŋani ki go tiegi. Lani n teni ke o wangi ti tuonbiadi danba o sanu.

⁹ O teni ke bi yumiindanba cuoni Mi teginma nni. O bangi bi yumiindanba o sanu.

¹⁰ O Diedo sanbila kuli tie ŋanbili leni teginma, Yaaba n kubi o ŋantaado leni o mabilikaama po.

¹¹ O Diedo, tieni n po sugili a yeli po. Kelima n tagili bia ki kandi.

¹² Yua n pia li fangili o Diedo po, O Diedo baa waani o wan baa gandi yaa sanu.

¹³ O baa yaa ye mi yemanma nni, O puoliŋuani mo baa diedi mi diema.

¹⁴ O Diedo pali ŋasiili ye yaaba n fangi o po yo. O baa teni ban bandi o ŋantaado.

¹⁵ N nuni pegidi ki nua o Diedo, Kelima wani n baa ñani nni i taali nni.

¹⁶ Pegidi ki noanli nni ki todi nni, Kelima n ye nbebe yo, Ki tie ninñinnilo.

¹⁷ I yanbani gbieni n pali, Faabi nni leni n yanbani.

¹⁸ Diidi ki le n fala leni n duoli, Ki pa nni n tuonbiadi kuli sugili.

¹⁹ Diidi ki le n yibalinba n yabi maama Leni ban nani nni yaa nanbiadiga.

²⁰ Kubi nni ki faabi nni! Da teni min le fe, N yaa cua ki wuoni a kani.

²¹ Mi teginma leni li papienli n kubi nni, Kelima n bili n dugidi a yaa kane!

²² Ŋain U Tienu! Faabi Isidayeli yaaba Leni bi paboanli buoli kuli!