Pisomi 24 - U TIENU MAAMA TILI 2013

Pisomi 24 O Diedo kua o diegu nni

1 Davidi yanbu.

¹ Davidi yanbu. O Diedo n die ki tinga Leni yaala n ye ki niinni. Wani n die li ŋandunli Leni yaaba n ye lienni kuli!

² Kelima wani n maani ki tinga Mi ñincianma po, Ki teni ke ki se a ñingola po.

³ Ŋme n pia u sanu ki do O Diedo juali yuli po? Ŋme n pundi ki kua o kaanŋamu nni?

⁴ Se yua yaa nii n ki joagini, Ke o pali mo pieni. Yua n ki puuni o yuli fanma bonla po. Yua kan pua faama ki poli.

⁵ O baa baa o Diedo seli Leni yaa teginma n ñani U Tienu yua n faabidi o kani.

⁶ Yaa nibuolu n lingi o N baa yaa tie maama n yeni. Bani yaaba n lingi Jakob Tienu nunga. Joma.

⁷ Yinba a buliñoana, Yugidi mani yi buliñoatuoga! Yinba hali u yogu buliñoana, Yugidi mani yiba, Ke ti kpiagidi bado n kua.

⁸ Ŋme n tie laa kpiagidi bado? O Diedo de! Yua n pia u fidu leni u paalu kuli, O Diedo de! Wani yua n tie bu toabu yudaano.

⁹ Yinba a buliñoana, Yugidi mani yi buliñoatuoga! Yinba hali u yogu buliñoana, Yugidi mani yiba, Ke ti kpiagidi bado n kua!

¹⁰ Ŋme n tie laa kpiagidi bado? Li Miali Diedo de! Wani U Paaciamu Kuli Daano, Wani n tie ti kpiagidi bado! Joma.