Pisomi 20 - U TIENU MAAMA TILI 2013

Pisomi 20 Ki jaandi o bado po

¹ Bi yanyinba yudaano yani siiga yanbu. Davidi yanbu.

² O Diedo n gaa a miabu li paboanli daali! Jakob Tienu yeli n kubi a!

³ Wan ña o kaangagidiŋamu nni ki nanli a! Wan ña Siyon ki cua ki todi a!

⁴ Wan yaa tiani a pada paabu kuli po, Ki yaa gaani a padijuukaana leni ki nunmanga.

⁵ Wan yaa puuni a a pali n bua yaala, Ki teni ŋan jagi yaala kuli n tieni.

⁶ Ti baa yigini leni li pamanli, Kelima a faabima po. Ti baa yugidi ti jakoandicabili ti Tienu yeli nni. O Diedo n tieni a po ŋan mia o yaala kuli.

⁷ Moala wani n bani ke o Diedo Baa todi wan gandi yua. Hali wan ye naankani tanpoli po, O baa gaa o miabu. O nujienu baa tieni mi banma ki faabi o.

⁸ Bi nitianba dugi bi toateliti po, Bine mo dugi bi taami po, Ama tinba wani dugi o Diedo Ti Tienu yaa paalu po yo.

⁹ Bani wani poali ki buani, ki baali. Tinba wani, ti se bonŋanla ke li pa.

¹⁰ O Diedo, teni o bado n paadi, Yeni o baa fidi ki guani ti, Ti yaa yini a yaa yogunu!