Pisomi 19 - U TIENU MAAMA TILI 2013

Pisomi 19 O Diedo kpiagidi leni o bali maama

¹ Bi yanyinba yudaano yani siiga yanbu. Davidi yanbu.

² Tanpoli togidi U Tienu kpiagidi, A ŋmabila mo doagidi o nii tuonli.

³ Daali kuli baa waani li dayali laa maama, Ñiagu kuli mo bangi ku ñiayagu lane.

⁴ Laa tie ban baa gbadi yaa maama ka, Laa didi tie ban gbadi bi nialu mo.

⁵ Ama bi fuuli ye u tingbanu kuli po, Bi nialu mo caa hali u tinbianu, Wan sieni li gbandieli u yienu po naani.

⁶ U yen pudi ki naani leni O puocaano calo n yen faa Ki ña o dieli nni leni yaa pamanli. U nani yaa jakoando n bogini Mi nuama po yeni.

⁷ O yen fii poyendu ki tagini o sanu tanpoli, Ki ban pundi u poyuu, Puu kuli kan fidi ki cia u jama.

⁸ O Diedo bali maama ŋani cain, Mi paagidi li pali, O Diedo siedi tie moamoani, Ki todi o yanpiidaano n baa mi yama.

⁹ O Diedo ñoamabonbilikaana tiegi, Ki mangidi li pali. O Diedo bali maama ŋani cain, Ki yendi i nuni.

¹⁰ O Diedo fangili ŋani, Li ye yogunu kuli. O Diedo ñoamabonbilikaana, Tie moamoani, ki go tiegi mo.

¹¹ Mi cie wula, ba yaa wula N ki pia joagindi. Mi mani ki cie ti siadi, Ba yaa siadi n gbie ku siabiabigu ki cuudi.

¹² A naacemo baa u fanu, Li ñuadi yabi yua tuo ki ŋoadi Mi yedima po.

¹³ Ŋme n baa fidi ki bandi o yuli po tudima? Tieni n po sugili leni min kaa bani yaa tudima po.

¹⁴ Faabi a naacemo leni bi japaadanba, Da teni ban paadi nni. Lani, n baa yaa tie papiendaano, Ki naa pia tagiliciamiba mo.

¹⁵ N ñoabu n maadi yaa maama Leni n pali n tia yaala, N dagidi ki yaa mani a po. Fini o Diedo yua n tie N tanciangu leni n daafaabika.