Pisomi 18 - U TIENU MAAMA TILI 2013

Pisomi 18 Davidi yini ki tuondi U Tienu o faabima po

¹ Bi yanyinba yudaano yani siiga yanbu, o Diedo naacemo Davidi yanbu. O Diedo n den faabi o o yibalinba leni Sayuli nuu nne, ke Davidi den yini laa yanbu.

² O den yedi: «N bua ŋa o Diedo, Fini n tie n paalu.

³ O Diedo n tie n tangu, N faabika leni n kaanpaalu, N Tienu leni n tangu min wuo naankani, N gbankoandigu leni yaa paalu n faabi nni, N kaanpaalu yuu n kpedi.

⁴ N kpaani ki yedi: ‹O Diedo yeli n baa ti pagidi! O faabi nni leni n yibalinba.

⁵ Mi kuuma gaali den luo nni. Mi bolinma kpeni den jiendi nni.

⁶ Bi tinkpiba diema baabi den gaani ki lindi nni. Mi kuuma taali den dia ki bili n nintuali.

⁷ N paboanli nni, n den jaandi Ki mia o Diedo todima. N kpaani ki mia n Tienu todima, Hali o badidiegu nni, O cengi n miabu bonŋanla.›

⁸ Ki tinga den begibi ki digibi, A juana tanpuuna den digibi, Likuli den begibi kelima U Tienu pali den beni.

⁹ I muñii den ña o miaboni nni, Yaa mu n bolindi den ña o ñoabu nni. A mukuanmoana moko den ña lienni.

¹⁰ O den kpegini tanpoli ki jiidi, Ke yaa tawaligu n biigi mo ye o taana po.

¹¹ O den jagi selubani po ki yugi, Ki laandi o faagu fiabi po.

¹² O den teni ke li biigili tua o wuonkaanu, Ki go tua wan ye yaa gbandieli nni. Yaa tayinu n gbie mi ñima ki kpiagi Ki go boani den lindi ki cebini o.

¹³ Ti tawadi, a tatana Leni a mukuana mo den ña Yaa yencianma n den ye o liiga, ki yadi.

¹⁴ O Diedo den tiani hali tanpoli po, Wani tanpolijoma Tienu den kpedi o nialu, Ke a tatana leni a mukuanmoana kuli ña.

¹⁵ O den toani o piemi ki yadi o yibalinba, O den pugini mi tañigima, ki deli ba.

¹⁶ O Diedo, a fuugu Leni yaa fawaama n ña a miani nni, Teni ke ki kpennunga den ñiidi, Ke ŋanduna tanpuuna moko den doagidi.

¹⁷ Hali tanpoli po, o den tandi o nuu ki cuo nni, Ki ñani nni mi ñincianma nni.

¹⁸ O faabi nni leni n yibali yua n pia u paalu, Ki taani leni n koanginkaaba yaaba n pa ki cie nni.

¹⁹ Bi den baa nni n paboanli daali, Ama o Diedo den tua n todika.

²⁰ O den ñani nni ki mabinga nni, Ki teni ke n diedi n yuli. O den faabi nni kelima o bua nni.

²¹ O Diedo tieni n po nani min tiegi maama, Nani n nii n ki pia biadima maama,

²² Kelima n cuoni o Diedo sani nni ke li tiegi. Mii ŋoadi mi biadima ki foagidi leni n Tienu.

²³ N kubi o ñoamabona, Mii jadi ki ŋaa o bali maama mo.

²⁴ N pali den pieni leni o, N kubi n yuli kaa kua tudima nni.

²⁵ O Diedo guani nni, Nani n teginma tie maama, Kelima n tieni wan sua ke yaala n dagidi.

²⁶ A tiegi yua n tiegi po. A tie papiendaano yua yaa pali n pieni po.

²⁷ A ŋani cain yua n ŋani po. Bi nibiadiba po, a baa waani ba Ke a fani ki cie ba.

²⁸ Fini n faabidi bi ninñinniba, Ki jiindi bi japaadanba.

²⁹ Fini n teni ke mi yenma yendi, Fini o Diedo n Tienu n yendi n biigili.

³⁰ A yaa paalu po n teni Ke n yen fidi ki deli li toagoli. N Tienu todima po yo, ke n yen fidi Ki yugi ki kandi u dogu bilinu.

³¹ U Tienu sani ŋani ki dagidi cain. O Diedo maama mo tie moamoani. O tie gbankoandigu yaaba n sani Ki baa o po kuli po.

³² Ŋme n tie U Tienu, Li yàá tie Li Miali Diedo yaa ka? Ŋme n tie ti Tanciangu, Li yàá tie ti Tienu yaa ka?

³³ U Tienu n pugindi n fidu, Ki pendi n sanu.

³⁴ O teni ke n taana yua nani o pialo yeni, Ki teni ke n se yaa kaani n kpedi po.

³⁵ O bangi nni bu toabu, Ki teni ke n nii fidi ki dia ti kumoandi dabanli.

³⁶ A gbankoandigu tie n faabima. A nujienu kubi nni. N tua niciamo kelima a ŋanbili po.

³⁷ A saagi n taana li cenli po, A teni ke mii cii ki tudi mo.

³⁸ N ŋoadi ki deli n yibalinba Hali ki nandi ba, N kan lebidi ki guani kaa bolini ba.

³⁹ N pe ki lu ba ke baa go fiidi. Bi baali ke n ŋmaadi ba.

⁴⁰ A puuni nni u fidu bu toabu po, A teni ke n paadi n koanginkaaba.

⁴¹ A teni ke n laa n yibalinba puoli. N baa bolini yaaba n nani nni mo.

⁴² Bi kuudi, ama candaano naa ye. Bi kpaani ki miadi o Diedo, Waa guandi ba liba.

⁴³ N pua ki lendi ba nani ku faagu N lendi yaa tangungu yeni. N koadi ba nani u sanu nni moamoadi yeni.

⁴⁴ A faabi nni leni bi niba janjanma. A tuni nni i nibuoli yuli, Min kaa den bani yaa nibuolu, tua n yonbi.

⁴⁵ Bi nilanba duondi nni, N yaa yedi yaala, bi tuodi lane.

⁴⁶ Bi nilanba gbani wudi, Ke bi ña bi wuonkaanpaali nni, ki digibi.

⁴⁷ O Diedo n yaa ye ki fo. Wani n Tanciangu n baa ti kpiagidi! U Tienu yua n tie n faabima n baa ti pagidi!

⁴⁸ Wani U Tienu yua n tuugi n po li panli, Ki tendi ke n diedi i nilanbuoli,

⁴⁹ Wani n gaani nni n yibalinba kani! A teni ke n cie n koanginkaaba. A faabidi nni ku tugumoangu daano nuu nni.

⁵⁰ O Diedo, lani n teni Ke n baa pagi a i nibuoli kuli siiga, N baa yiini ki kpiagi a yeli.

⁵¹ O puuni wan gandi yaa bado mi faabicianma. O tiendi wan gandi Davidi yua Leni o puoliŋuani mi ŋanma, Hali yaa yogu n tuu yaa yogu.»