Pisomi 17 - U TIENU MAAMA TILI 2013

Pisomi 17 O Diedo, nanli nni

1 Davidi jaandi.

¹ Davidi jaandi. O Diedo, cengi yaala n tiegi, Cengi n miabu bonŋanla. Diadi a tubili ki cengi min jaandi Yaa jaandi leni li payenli.

² Cedi n moamoani n pundi a nintuali, A nuni n le mi teginma n ye naani.

³ A Diidi n pali bonŋanla, Ki goandi li ku ñiagu. A biigidi nni, Ama ŋaa laa tagiliba kuli. N ñoabu mo naa kua n liiga.

⁴ N kubi n yuli leni biyaba n tiendi yaala, Ki foagidi leni ti tuonbiadi danba, Kelima a maama n yedi yaala po.

⁵ N taana se bonŋanla a sanu nni. Mii jadi ki ŋaa ŋan bili n po yaa sanu.

⁶ N jaandi ki miadi a n Diedo, Kelima a gaani n jaandi. Diadi a tubili ki cengi n maama, Cengi min baa yedi a yaala.

⁷ Fini yua n faabidi yaaba n lingi u wuonkaanu, Doagidi a tuona n ŋani maama, Ki gaa ba yaaba n fii ki sedi bi po, Leni mi jama nuu nni.

⁸ Kubi nni nani a nunbu yeni, Wuoni nni a fiabi soangu nni.

⁹ Fii ki gaa nni bi nibiadiba yaaba N wangi nni fala yeni kani, Ki paadi n yibalinba Yaaba n gaani ki cebini nni.

¹⁰ Bi juagi bi pala kaa gba ninñima, Bi maadi leni ti japaadi.

¹¹ Bi ŋua ki deli nni, Ki gaani ki lindi nni, Ki diidi ban baa guli nni yaa yogunu.

¹² Bi tie nani yaa yangbanli n wuo Ki bua cuo ki toadi toadi yeni.

¹³ O Diedo, fii ki sedi n koanginkaaba po, Ki tudi ki lu ba tiipo, ki taa a jugisiega, Ki faabi nni bi nibiadiba yeni nuu nni.

¹⁴ O Diedo, deli ki ñani ba ŋanduna ne niinni, Lani n tie bi biinu yaa jamaano n tie ne niinni. Guoni ba leni ŋan sieni ba yaala, Ki teni bi bila mo n je la ki guo, Ki sieni la bi yaabila po.

¹⁵ Ama mini wani n teginma nni, N baa le a nunga. N yaa fundi yaa yogunu, N baa ñuadi ŋan tie maama ki guo.