Pisomi 147 - U TIENU MAAMA TILI 2013

Pisomi 147 Ti Tienu yabi

¹ Pagi mani o Diedo! Li ŋani tin yiini ki kpiagi ti Tienu, Kelima li ŋani ki go mani tin pagi o.

² O Diedo guani ki maa Jerusalemi, O guani ki taani Isidayeli yaaba, Yaaba n den ye ti yonbidi.

³ O duandi yaaba yaa pala n biidi yama, Ki buu yaaba n poagili mo.

⁴ O coadi a ŋmabila n da maama, Ki puuni akuli a yela.

⁵ Ti Diedo yabi, O fidu mo yabi hali boncianla, O yanfuoma mo ki pia bianu.

⁶ O Diedo kubi bi yumiindanba, Ama o jiindi bi nibiadiba hali tiipo.

⁷ Yiini mani o Diedo po, Ki tiadi o ŋanma po. Yiini mani ki pagi ti Tienu leni ku gogidigu.

⁸ O pini tanpoli leni ti tawadi, Ki bogindi ki taaga ki tinga po, Ki teni ke ti muadi mo pudi a juana po.

⁹ O puuni ti yandi mi jiema, A kankala bila mo n mua mi koma yaa yogunu.

¹⁰ O taamo jama naa tua o liba, O baga mo ki ye leni o nisaalo gbanmanu.

¹¹ Wani o Diedo mangidi o pali Yaaba n fangi o po, Leni yaaba n dugi o ŋanbili po.

¹² Jerusalemi, kpiagi o Diedo! Siyon, pagi a Tienu,

¹³ Kelima o pugini a buliñoaluoditi u paalu. O seligidi a bijaba yaaba n ye a niinni.

¹⁴ O tieni mi yanduanma a diema nni, Ki teni ke a guo leni ŋalikamamoano.

¹⁵ O tuuni o ñoamabona ki tinga nni, Ke o maama mo jaligi ki caa tontoni.

¹⁶ O teni ke a tatana jiidi Nani ti kunkundi yeni, Ki yadi mi tatanyoma mo Nani mi fantanpienma yeni.

¹⁷ O teni ke a tatana ji bongbenga gbenga. Ŋme n baa fidi ki sedi o wadi nintuali?

¹⁸ O yaa li ñani ñoamabonli, Se a tatana yeni n yondi yondi. O yen teni u faalu n yaa figi, Mi ñima n yaa puubi.

¹⁹ O doagidi o maama Jakob po, O mabilikaama leni o ñoamabona Isidayeli po.

²⁰ O naa tieni laa bonla Yaa nibuoli n sieni kuli po. Laa nibuoli mo naa bani O ñoamabonbilikaana. Pagi mani o Diedo!