Pisomi 145 - U TIENU MAAMA TILI 2013

Pisomi 145 A bali ki pia gbenma

1 Ti pagidi yanbu, yaabu n tie Davidi yaabu.

¹ Ti pagidi yanbu, yaabu n tie Davidi yaabu. N Tienu, n bado, n baa kpaani ki pagi a! N baa pagi a yeli yaa yogu n tuu yaa yogu!

² Daali kuli n baa pagi a. N go baa pagi a yeli yaa yogu n tuu yaa yogu!

³ O Diedo yabi ki pundi ki baa ti pagidi, O yabinu mo naa pia bandi-gbenma.

⁴ Nifiima kuli n kpiagi a tuona, Ki togidi yaa nifiima n ŋua ma, Ŋan bili yaa jama kuli.

⁵ N baa togidi a bancianma kpiagidi ŋamu, Ki go waani a tuonciama togida.

⁶ Bi baa yaa maadi a paalu jeje maama, Mini mo n yaa togidi ŋan yabi maama.

⁷ Bi baa tiadi yogunu kuli a ŋancianma po, Ki go yaa pagi a teginma mo.

⁸ O Diedo tiendi mi ŋanma, Ki go gba mi ninñima. O pali ki be tontoni, Ama o ŋanbili yabi hali boncianla.

⁹ O Diedo ŋani bi niba kuli po, O ninñingbadima mo ye o tuona kuli po.

¹⁰ O Diedo, a tuona kuli baa pagi a! A nidugikaaba mo baa pagi a.

¹¹ Bi baa togidi a bali kpiagidi, Ki maadi a paalu maama mo.

¹² Bi baa teni bi nisaalilieba n bandi a bancianma po, Ki go bandi a bali kpiagidi n ŋani maama.

¹³ A bali tie yaa bali n ye yaa yogu n tuu yaa yogu, A diema mo ye nifiima n tuu nifiima kuli nni.

¹⁴ O Diedo kubi yaaba n ŋmadi ki baali kuli, Ki fiindi ki siendi yaaba n poali ki buandi kuli.

¹⁵ Bikuli pegidi bi nuni ki nua fine leni mi suginma, Fini n puuni ba mi jiema li yogunu yaa pundi.

¹⁶ A yen tandi a nuu, Ki pa mialifo kuli n miadi a yaala.

¹⁷ O Diedo tiegi o sani nni kuli, Ki pia li ŋanbili o tuona nni kuli.

¹⁸ O Diedo kuu leni yaaba n jaandi ki miadi o, Bani yaaba n jaandi ki miadi o leni i moamoani.

¹⁹ O tendi ke yaaba n fangi o baadi Ban miadi yaala kuli. O gba bi bubula ki faabidi ba.

²⁰ O Diedo kubi yaaba n bua o kuli, Ama o bolindi bi nibiadiba.

²¹ N ñoabu n yaa yiini ki pagi o Diedo, Mialifo kuli n yaa pagi o yeli Yaali n gagidi ki ŋani, Hali yaa yogu n tuu yaa yogu kuli!