Pisomi 144 - U TIENU MAAMA TILI 2013

Pisomi 144 Yaaba n caa bu toabu yanbu

1 Davidi yanbu.

¹ Davidi yanbu. N pagi o Diedo n tanciangu, Wani yua n bangi nni bu toabu, Ki bogini nni mi janjanma po.

² O tie yua n ŋanbidi n po, Ki go tie n kaanpaalu, N wuonkaanu yuu n kpedi Leni n candaano, n gbankoandigu. O tie min sani ki wuoni yua yaa kani. Wani n teni ke n niba tuo n yedima.

³ O Diedo, o nisaalo tie be yo, Hali ke a baa bandi o? O nisaalo biga tie be yo, Hali ke a baa yaa tiani o po?

⁴ O nisaalo tie nani mi fuoma yeni, O miali dana mo tiini, Nani u soangu n tiini maama yene.

⁵ O Diedo, kpegini tanpoli ki jiidi, Ki sii a juana ki teni ŋan yaa ña i muñii.

⁶ Teni i tañigi n ñigi ki yadi n yibalinba, Toa a piemi ki yadi ba.

⁷ Tandi a nii hali tanpoli po ki faabi nni, Ki ñani nni mi ñincianma leni bi canba nuu nni,

⁸ Bani yaaba yaa ñoana n pua mi faama, Ke bi nijieni mo gbie leni i janbi yeni.

⁹ U Tienu, n baa yiini a po bu yanpanbu, N baa yiini ki pagi a leni joma piiga gogidigu ki yedi:

¹⁰ «Fini n puuni bi badiba mi faabima, Ki faabidi a naacemo Davidi Leni ki jugisiebiadiga.»

¹¹ Faabi nni ki gaa nni bi canba yeni nuu nni, Bani yaaba yaa ñoana n pua mi faama, Ke bi nijieni mo gbie leni i janbi yeni.

¹² Ti bijaba tie nani ku tibigu, Yaagu n kpedi ku panma nni yeni. Ti bisiaba mo ŋani, Nani ban kpie yaa benjielu badidiegu po yeni.

¹³ Ti buabuana gbie leni ti kpaandi buoli kuli. Ti yanbidi mo pili ki pugidi tuda tuda, Ki go pili ki pugidi tuda piiga piiga i kuani nni.

¹⁴ Ti ne mo noadi bonŋanla, Ti bilini mo kan go padi, Bi kan go cuo ti ti yonbidi, Bubuumu mo kan go pua ti daamu nni.

¹⁵ Li pamanli ye leni yaa nibuolu N baa laa ŋanbili! Li pamanli ye leni yaa nibuolu, Ke o Diedo n tie bi Tienu!