Pisomi 143 - U TIENU MAAMA TILI 2013

Pisomi 143 Bu miabu

1 Davidi yanbu.

¹ Davidi yanbu. O Diedo, cengi n jaandi, Diadi a tubili ki cengi n miabu! Gaa n po n jaandi, Kelima a moamoani leni a teginma po!

² Da bu leni mini a naacemo, Kelima nisaalimialiba kuli ki tiegi a nintuali.

³ Yibali ŋua ki faligidi nni, O guli nni ki baa ŋmaa ki midi nni, Ki teni ke n ye li biigili nni, Nani yaaba n kpe ke li waagi yeni.

⁴ N coagi ki gbali mi fuoma, N tugusoama sani ke n jigi mo cie.

⁵ N tiadi hali u yogu nni, Ki kpaagi a tuona kuli po, Ki tia a nii bontienkaala kuli po.

⁶ N yugidi n nii ki teli a po ki miadi a, N pali mo bua ŋa nani yaa tinga n kuodi N bua mi ñima maama yeni. Joma

⁷ O Diedo, jaligi ki guani n po, N tadigi ki kan go fidi ki fuo. Da buli nni a nunga, Lani yaa ka, n baa tua nani yaaba N ji mi kuuma buogu nni yene.

⁸ Teni min le a ŋanbili hali ke li daa yendi, Kelima n dugi fini yaa po yo. Teni min bandi min baa tagini yaa sanu, Kelima n pegidi ki nua fine.

⁹ O Diedo, faabi nni leni n yibalinba! N sani ki wuoni fini yaa kane.

¹⁰ Bangi nni min yaa tiendi a yanbuama, Kelima fini n tie n Tienu. A Fuoma yaama n ŋani n yaa gobidi, Ki cangi nni naani n ki pia tuudili.

¹¹ O Diedo, teni min yaa ye kelima a yeli po! Ñani nni li paboanli nni, Kelima a teginma po!

¹² A ŋanbili po, a baa bolini n yibalinba, Ki teni yaaba n koani leni nni kuli n bodi, Kelima n tie a naacemo.