Pisomi 140 - U TIENU MAAMA TILI 2013

Pisomi 140 Ban nani yua jaandi

¹ Bi yanyinba yudaano yani siiga yanbu, Davidi yanbu.

² O Diedo, faabi nni leni bi nibiadiba! Kubi nni leni bi tugumoandanba!

³ Bi li kpaagi mi biadima bebe yo bi pala nni, Ki lingi daali kuli mi janjanma.

⁴ Bi calini bi landi nani i we yeni, Bi ñoana nni mo gbie leni a waalaba loabidi. Joma.

⁵ O Diedo gaa nni bi nibiadiba nuu nni, Kubi nni leni bi tugumoandanba, Yaaba n kpaagi ki bua ki guli nni.

⁶ Bi japaadanba dia nni ku diagu leni i baabi, Bi dia i taali n sanu nni, Ki balini u sankunu mo ki dia nni a tela.

⁷ Ama n den yedi o Diedo: «A tie n Tienu! O Diedo diadi a tubili ki cengi n miabu!

⁸ N Diedo U Tienu, fini yua n tie N faabima fidu, A kubi nni bu toabu daali.

⁹ O Diedo, da tuo bi nibiadiba yanbuama n tieni, Da tuo ban jagi yaala n cua, Ke ban da ti fiini bi yula.» Joma

¹⁰ Yaaba n gaani ki lindi nni yeni kuli, Biadima n guani ki jiidi bi yula po.

¹¹ A mukuanmoana n yaa wuliti bi po, Ban pieni ki lu ba u mu nni leni i kuli nni, Naankani ke bi kan go fii.

¹² Ti mabiadi danba n da go ye mi diema nni. O tugumoandaano mo, Fala baa ŋoadi o ke li kan waagi.

¹³ O Diedo, n bani ke a saagi I moamoani o ninñinnilo po, Ki ja yaa buudi n tiegi taliginba po.

¹⁴ Moamoani de! Bi niteginkaaba baa pagi a yeli, Yaa niba n tiegi mo n yaa ye a nintuali.