Pisomi 14 - U TIENU MAAMA TILI 2013

Pisomi 14 Bi nisaaliba yanluoma leni bi biadima

1 Bi yanyinba yudaano yani siiga yanbu, Davidi yanbu.

¹ Bi yanyinba yudaano yani siiga yanbu, Davidi yanbu. O yanluodaano tua o pali nni: «U Tienu naa ye.» Bi biidi bi yula, Ki tuuni yaa tuona n gundi hali boncianla. Yua n tiendi yaala n ŋani naa ye.

² O Diedo ye hali tanpoli, Ki biindi ki diidi bi nisaaliba, Ki baa le o yanfuodaano yua n lingi U Tienu Yaa ye bi siiga,

³ Bikuli yaadi, bikuli biidi. Yua n tiendi yaala n ŋani naa ye, Ba niyendo!

⁴ O Diedo yedi: «Yaaba n tiendi mi biadima yeni, Baa bani liba kuli!» Bani yaaba n di n niba nani mi jiema yeni, Baa jaandi ki miadi o Diedo.

⁵ Bi nibiadiba baa digibi boncianla, Kelima U Tienu ye bi niteginkaaba siiga.

⁶ Yinba bi nibiadiba, yi teni Ke bi ninñinniba dugidi lebidi ki tua fe, Ama o Diedo n tie bi wuonkaanu.

⁷ Ŋme n baa cuani mi faabima Siyon nni Isidayeli yaaba po? O Diedo yaa ti ñani o niba Ti yonbidi nni yaa yogunu, Jakob puoliŋuani baa yaa ye Leni li pamancianli, Bani Isidayeli yaaba yeni baa yigini!