Pisomi 137 - U TIENU MAAMA TILI 2013

Pisomi 137 Yaaba n gedi Babilonni ti yonbidi yanbu

¹ Ti den kaa Babilonni kpenciami balinma, Ki tiadi Siyon po ki buudi.

² Ti den joangi ti gogiditi I kpenciami yeni tiidi.

³ Lankane ke ti yonbidanba den miadi ti i yani. Yaaba n den mabindi ti den mia ti i pamandanyani. Bi den tua ti: «Yiini mani ti po Siyon yani!»

⁴ «Ti baa tieni lede ki yiini O Diedo yani mi dielanma nni?»

⁵ Jerusalemi, n yaa sundi a po, N nujienu mo n sundi n po.

⁶ N yàá tiani fini Jerusalemi po, N yàá teni ke fini Jerusalemi N tua n pamanmoanli, N lanbu n sani ki tabini n lanŋaangu.

⁷ O Diedo, da sundi Edomi yaaba N tieni yaala, Bani yaaba n den tua, Ban paadi Jerusalemi yaa daali: «Koadi mani! Koadi mani hali a tanpuuna!»

⁸ Babilonni, ban baa jugi fini yua, Li pamanli baa yaa ye leni yua n baa guani a, Ŋan tieni ti yaa biadima yeni kuli.

⁹ Li pamanli baa yaa ye leni yaaba n baa cuo a bila, Ki ŋmaa ki midi midi ba ku tangu po.