Pisomi 136 - U TIENU MAAMA TILI 2013Pisomi 136 Pagi mani Isidayeli faabika 1 Pagi mani o Diedo kelima o ŋani, O ŋanbili mo ye hali yaa yogunu kuli! 2 Pagi mani i tieni kuli Tienu Kelima o ŋanbili ye hali yaa yogunu kuli! 3 Pagi mani bi diediba kuli Diedo, Kelima o ŋanbili ye hali yaa yogunu kuli! 4 Wani bebe n tiendi mi bancianmoanma, Kelima o ŋanbili ye hali yaa yogunu kuli! 5 Wani n den tagi tanpoli leni mi yanfuoma, Kelima o ŋanbili ye hali yaa yogunu kuli! 6 Wani n maani ki tinga mi ñima po, Kelima o ŋanbili ye hali yaa yogunu kuli! 7 Wani n den tagi mi yenma buoli kuli, Kelima o ŋanbili ye hali yaa yogunu kuli! 8 U yienu ke wun diedi u yensiinu, Kelima o ŋanbili ye hali yaa yogunu kuli! 9 O ŋmaalo leni a ŋmabila mo n diedi ku ñiagu, Kelima o ŋanbili ye hali yaa yogunu kuli! 10 Wani n den kpa Ejipiti yaaba bonjakpiala kuli, Kelima o ŋanbili ye hali yaa yogunu kuli! 11 Ki teni ke Isidayeli yaaba ñani bi siiga, Kelima o ŋanbili ye hali yaa yogunu kuli! 12 O den ñani ba leni o nuu paalu, Kelima o ŋanbili ye hali yaa yogunu kuli! 13 Wani n den jia ki boagidi Mi Ñincianmoanma kaanilie, Kelima o ŋanbili ye hali yaa yogunu kuli! 14 Wani n den teni ke Isidayeli yaaba poandi mi siiga, Kelima o ŋanbili ye hali yaa yogunu kuli! 15 Ama o den guli Faraon Leni o toagoli mi Ñincianmoanma nni, Kelima o ŋanbili ye hali yaa yogunu kuli! 16 Wani n den gobidi o niba mi fanpienma nni, Kelima o ŋanbili ye hali yaa yogunu kuli! 17 Wani n den kpa bi badicianba, Kelima o ŋanbili ye hali yaa yogunu kuli! 18 O go den kpa yaa badiba n pia u paalu, Kelima o ŋanbili ye hali yaa yogunu kuli! 19 Lani n tie: Sihoni, Amoriti yaaba bado, Kelima o ŋanbili ye hali yaa yogunu kuli! 20 Wani n go den kpa Ogi Basan yaaba bado, Kelima o ŋanbili ye hali yaa yogunu kuli! 21 O den taa bi diema ki puni Ke mi tua piama, Kelima o ŋanbili ye hali yaa yogunu kuli! 22 O de teni ke mi tua o naacenba Isidayeli yaaba piama, Kelima o ŋanbili ye hali yaa yogunu kuli! 23 Ban den fiagidi ti yaa yogunu, O den tiadi ti po, Kelima o ŋanbili ye hali yaa yogunu kuli! 24 O den faabi ti yaaba n mabindi ti nuu nni, Kelima o ŋanbili ye hali yaa yogunu kuli! 25 Wani n puuni pia miali kuli mi jiema, Kelima o ŋanbili ye hali yaa yogunu kuli! 26 Jaandi ki pagi mani tanpoli Tienu, Kelima o ŋanbili ye hali yaa yogunu kuli! |
Gulmancema Protestant Bible © Bible Society of Burkina Faso, 2013.
Bible Society of Burkina Faso