Pisomi 135 - U TIENU MAAMA TILI 2013

Pisomi 135 Ti pagidi yanbu

¹ Pagi mani o Diedo! Pagi mani o Diedo yeli, Pagi mani o Diedo, yinba o naacenba.

² Yinba yaaba n ye o Diedo diegu nni Leni ti Tienu diegu luoli nni,

³ Pagi mani o Diedo kelima o ŋani. Yiini mani ki kpiagi o yeli, Kelima o ŋanbili po.

⁴ O Diedo gandi o yuli po Jakob, Ki teni ke o puoliŋuani Isidayeli yaaba Tua wan die yaaba.

⁵ Yeni de! N bani ke Li Miali Diedo yabi, Ti Diedo yabi ki cie bonla kuli.

⁶ O Diedo n bua yaala kuli o tiendi la, Tanpoli leni ki tinga nni kuli, Mi ñincianma leni i kuli nni kuli.

⁷ O yen teni ti tawadi n fii Hali ki tinga bianu, Ki teni i tañigi n cuani ki taaga, Ki teni u faalu mo n luodi.

⁸ Wani n den kpa Ejipiti bonjakpiala kuli, Ki cili bi niba bila ki ban taani Leni ti yandi yaa bila kuli.

⁹ O den soani sinankeene leni li bonlidinkaala, Fini Ejipiti diema siiga, Ki fii ki sedi Faraon leni o naacenba po.

¹⁰ O den kpa i nibuoli boncianla, Ki den kpa yaa badiba n pia u paalu,

¹¹ Lani n tie Sihoni, Amoriti yaaba bado, Ogi, Basan yaaba bado Leni Kanana diema badiba kuli.

¹² Lani, o den taa bi diema ki puni Ke mi tua o niba Isidayeli yaaba piama.

¹³ Li Miali Diedo, bi baa yaa taagi a yeli u yogunu kuli, A li baa yaa tie Li Miali Diedo yo, nifiima n tuu nifiima.

¹⁴ O Diedo baa saa o niba po i moamoani, Kelima o baa gbadi o naacenba po mi ninñima.

¹⁵ Bi nilanba buli tie ŋanjilifa leni wula bebe, Bi nisaaliba nii n tagi yaala.

¹⁶ Yi buli yeni pia a ñoana, Ki naa maadi. Yi pia i nuni, ki naa nua.

¹⁷ Yi pia a tuba, ki naa gba, Maamiba mo ki ña bi ñoana nni.

¹⁸ Yaaba n tagi yi kuli Leni yaaba n dugi yi po kuli, N tua nani yini yeni.

¹⁹ Yinba Isidayeli buoli yaaba, Pagi mani o Diedo! Alono puoliŋuani bi kopadicianba, Pagi mani o Diedo!

²⁰ Levi buolu, Pagi mani o Diedo! Yinba yaaba n fangi o Diedo, Pagi o mani!

²¹ O Diedo yua n ye Jerusalemi yeni, Pagidi n cili Siyon. Pagi mani o Diedo!