Pisomi 132 - U TIENU MAAMA TILI 2013

Pisomi 132 O Diedo, tiadi Davidi po

1 Ban caa Jerusalemi ki yiini yaa yanbu.

¹ Ban caa Jerusalemi ki yiini yaa yanbu. O Diedo, tiadi Davidi po Leni wan laa yaa fala kuli po!

² Davidi den poli o Diedo po, Wani Jakob Paaciamu Daano yeni, Ki niani u naa ñoanianu ki yedi:

³ «N kan kua min ye yaa gbandieli nni, N kan do min dua yaa duanu po,

⁴ N kan pa n nuni guama, Ki buali min gonbidi,

⁵ Kaa baa o Diedo po kaanu, Kaa baa wani Jakob Paaciamu po u yekaanu.»

⁶ Ti den gaa laabaali Ke ku ŋantaadikpaku ye Efrati po. Ti den ban laa ku Yaadi koadeba nni.

⁷ Tin gedi mani o Diedo yekaanu, Ki ban gbaani o taaŋmaakaanu kani, Ki pugi o.

⁸ O Diedo, fii ki ciani ku kpaku yeni, A paalu n ye yaagu yaa niinni, Ki cua ki kua a fuodima kaanu.

⁹ Teni a kopadicianba n yaa la Mi teginma nani ti tiayiekaadi yeni, A nidugikaaba mo n yaa yigini Ki doagidi bi pamanli!

¹⁰ Nani ŋan bua a naacemo Davidi maama, Ŋan da yie ŋa gandi yua yeni.

¹¹ O Diedo den poli ki niani Davidi u ñoanianu, Yuu n ki pia lebidima ki yedi: «N baa kaani a puoliŋuani siiga Niyendo a bali kalikaanu po.

¹² A bijaba yaa kubi n ŋantaado Leni min teni ba yaa ñoamabona, Bi bijaba n baa yaa kaa yogunu kuli A bali kalikaanu po.»

¹³ O Diedo den gandi Siyon yo Ke likani n tua wan baa yaa ye naani.

¹⁴ O den yedi: «Lankani n tie N fuodima kaanu yaa yogunu kuli po. N baa yaa ye lienni kelima n bua likani.

¹⁵ N baa seligi Siyon, Ki teni o luoda kuli n je ki guo.

¹⁶ N baa lani o kopadicianba mi faabima, O nidugikaaba mo n yaa yigini Ki doagidi bi pamanli.

¹⁷ Lankane n baa pugini Davidi paalu, Ki go bogini yua n baa gaa Min gagidi yaa bado yeni kaanu.

¹⁸ N baa wali o yibalinba kuli i fe, Ama n baa cibini wani wani, Yaa badifogiliga n ñuliti.»