Pisomi 116 - U TIENU MAAMA TILI 2013

Pisomi 116 Ban faabi yua leni mi kuuma jaandi

¹ N bua o Diedo kelima o cengi Min jaandi ki miadi o yaala.

² O kpegini o tubili ki cengi n miabu. N baa yaa jaandi ki miadi o, N miali dana nni kuli.

³ Mi kuuma baabi den luo nni kankani, Ke bi tinkpiba diema paboanli nandi nni, Ke n pali biidi ki boandi boncianla.

⁴ Ama n den taa o Diedo yeli, Ki jaandi ki mia o ki yedi: «N mia ŋa o Diedo, Gaa n miali ki teni nni!»

⁵ O Diedo tie mi ŋanma leni mi teginma daano. Ti Tienu gba mi ninñima.

⁶ O Diedo kubi bi yumiindanba. N den tadigi, ama o faabi nni.

⁷ N den yedi: «N naano, guani ki yaa fuo, Kelima o Diedo tieni a po mi ŋanma.»

⁸ O Diedo, a faabi n naano leni mi kuuma, Ki faabi n nuni leni ti nunsiidi, Ki faabi n taana mo leni li tingbali.

⁹ N baa cuoni o Diedo nintuali, Bi nifuodiba tinga nni.

¹⁰ N den pia ti dugidi, Ba min den tua yaa yogunu: «N tie ninñinnilo.»

¹¹ N yanyagidi nni n den tua: «Nisaalo kuli tie tuofaadaane.»

¹² N baa tieni lede ki fidi ki guani O Diedo n tieni n po yaa ŋanma kuli?

¹³ N baa yugidi mi faabima tadiñokaaga, Ki taa o Diedo yeli ki mia o todima.

¹⁴ N baa kuani min den niani O Diedo yaa ñoaniani, O niba kuli nintuali.

¹⁵ Bi nidugikaaba kuuma Koani o Diedo.

¹⁶ N mia ŋa o Diedo kelima n tie a naacemo, A naacemo, a puotuado n mali yua! A den lodi n po n yonbidi baabi.

¹⁷ N baa padi a po i tuondi pada, Ki taa o Diedo yeli ki jaandi a.

¹⁸ N baa kuani min den niani O Diedo yaa ñoaniani, O niba kuli nintuali,

¹⁹ O Diedo diegu nni Leni fini Jerusalemi dogu siiga. Pagi mani o Diedo!