Pisomi 115 - U TIENU MAAMA TILI 2013

Pisomi 115 U Tienu bebe n baa baa ti kpiagidi

¹ Laa tie tinba ka, O Diedo, laa tie tinba ka, Ama fini bebe yaa yele n baa ti pagidi, Kelima a ŋanbili leni a teginma po.

² Be yaa po ke i nilanbuoli baa yedi: «Bi Tienu nan ye le yo?»

³ Ti Tienu ye tanpoli Ki tiendi wan bua yaala kuli!

⁴ Bi buli kuli tie ŋanjilifa leni wula bebe, Bi nisaaliba n tagi yaala.

⁵ Bi buli yeni pia a ñoana, Ki naa maadi. Yi pia i nuni ki naa nua,

⁶ Ki pia a tuba ki naa gba, Ki pia i miani ki naa gba nuulu.

⁷ Yi pia i nii, ki nan kan fidi ki sii liba, Ki pia a taana, ki naa cuoni. I buli yeni naa tiendi lanbuba leni bi niali.

⁸ Yaaba n tagi ba leni yaaba n dugi bi po kuli, N tua nani laa buli yeni.

⁹ Yinba Isidayeli yaaba, Yaa dugi mani o Diedo po, Kelima wani n tie yi todika Leni yi gbankoandigu.

¹⁰ Yinba Alono buolu, Yaa dugi mani o Diedo po, Kelima wani n tie yi todika Leni yi gbankoandigu.

¹¹ Yinba yaaba n fangi o Diedo, Yaa dugi mani o Diedo po, Kelima wani n tie yi todika Leni yi gbankoandigu.

¹² O Diedo tiani ti po, o baa seligi ti. O baa seligi Isidayeli yaaba. O baa seligi Alono puoliŋuani.

¹³ O baa seligi bani yaaba n fangi o, Li taliginba leni li paatieba kuli.

¹⁴ O Diedo n teni yinba leni yi bila kuli, N yaa pili ki pugidi.

¹⁵ O Diedo yua n tagi tanpoli Leni ki tinga n seligi yi.

¹⁶ Tanpoli tie o Diedo bebe n die naani, Ama o puni bi nisaalibe ki tinga.

¹⁷ Laa tie bi tinkpiba bi yaaba N ye bi tinkpiba diema nni ka Baa fidi ki pagi o Diedo.

¹⁸ Ama tinba n baa pagi ki tuondi o Diedo, Ki cili moala leni yaa yogunu kuli. Pagi mani o Diedo!