Pisomi 110 - U TIENU MAAMA TILI 2013

Pisomi 110 Yua n tie bado leni kopadiciamo

1 Davidi Pisomi.

¹ Davidi Pisomi. Li Miali Diedo den yedi n Diedo: «Kali n jienu po, Hali min baa guli a yibalinba ŋan ŋmaa ba.»

² O Diedo n cili Siyon kani ki pugini a paalu, Ki teni ŋan diedi a yibalinba, Yaaba n gaani ki lindi a kuli.

³ A paalu yaa doagidi yaa daali, A niba pia li yankuali bonŋanla, Nani ku mangu n yen luoni U tiŋaafaanu maama yeni. A jawaaba baa cua a kani Ki la yaa tiadi n gagidi U Tienu po.

⁴ Lani yaa po, o Diedo den poli Yaa poli n tie ne, ki nan kan go lebidi: «A tie kopadiciamo yaa yogunu kuli Nani Melikisedeki yeni.»

⁵ O Diedo ye a jienu, O pabienli daali mo, O baa ŋmaa ki midi bi badiba.

⁶ O jia ti buudi leni i nibuoli, Ki teni ke i kaani kuli gbie leni bi tinkpiba, O ŋmaa ki midi midi mi diecianma yudanba.

⁷ O baa yaa cuoni ki ñu u fuanu nni ñima, Lani n baa teni wan yaa cuoni ke o yuli ya.