Pisomi 107 - U TIENU MAAMA TILI 2013

Li timuuli 107—150 Pisomi 107 Tin tuondi U Tienu ti faabika

¹ Pagi mani o Diedo kelima o ŋani, O ŋanbili mo ye hali yaa yogunu kuli!

² O Diedo n daa ki faabi yaaba kuli n yedi yeni, Wan daa ki faabi yaaba bi yibali nuu nni n yedi yeni.

³ O ñani ba diema nni kuli, Puoli leni nintuali, nuganu Leni nujienu po kuli ki taani ba.

⁴ Bi den puagi mi fanpienma nni, Ki naa bani ban baa tagini yaa sanu, Ki pundi yaa dogu n pia bi niba.

⁵ Bi den ye leni mi koma Leni u ñuñuunu ke bi gbani wudi.

⁶ Bi paboanli nni, bi den buudi O Diedo kani ke o den faabi ba Leni bi paboanli.

⁷ O den gobidi ba ki tagini ba yaa sanu n koabi, Ki teni ke bi pundi ban caa yaa dogu nni.

⁸ Ban pagi o Diedo kelima o ŋanbili po, Leni wan tiendi yaa bancianma bi nisaaliba po.

⁹ O puni u ñuñuunu n bi pia yaaba mi ñima, Ki dini mi koma n bi pia yaaba mo hali ke bi guo.

¹⁰ Bi tianba den ye li biigili nni Leni mi kuuma jinjingu nni, Ki tie kpaada ki luo leni ti kudi ki ye fala nni,

¹¹ Kelima bi den tua niyiekaaba U Tienu maama po, Ki fali tanpolijoma Badiciamo tundi.

¹² O den duoli ba leni fala ke bi jadibi, Ki naa den baa yua n baa todi ba.

¹³ Bi paboanli nni, bi den buudi o Diedo kani, Ke o den faabi ba leni bi paboanli.

¹⁴ O den ñani ba li biigili Leni mi kuuma jinjingu nni, Ki kua kua bi kpaadi.

¹⁵ Ban pagi o Diedo kelima o ŋanbili po, Leni wan tieni yaa bancianma bi nisaaliba po!

¹⁶ O pua ki mudi ti kumoandi buliñoana, Ki kua a buliñoana bonluoditi.

¹⁷ Bi tianba den waani bi biadima bi yanpiima nni. Bi den kuani bi yula fala nni kelima bi tagili po.

¹⁸ Jiemiba kuli ki go den mani bi po, Kelima bi ji den caa mi kuuma po yo.

¹⁹ Bi paboanli nni, bi den buudi o Diedo kani, Ke o den faabi ba leni bi paboanli.

²⁰ O den maadi mayenma ki paagi ba. O den gaa ba mi kuuma nuu nni.

²¹ Ban pagi o Diedo kelima o ŋanbili po, Leni wan tieni yaa bancianma bi nisaaliba po.

²² Ban padi i tuondi pada ki pagi o Diedo, Ki togidi wan soani yaa tuona kuli Leni li pamanli yigimi.

²³ Yaaba n den ye ti ñinbiaciandi nni, Ki goadi mi ñincianma po, Ki tiendi bi kpendu mi ñincianma po,

²⁴ Landanba den laa o Diedo tuona Leni o bancianma mi ñincianma nni.

²⁵ O den maadi ke ku tafaaciangu fii, Ki fiini a ñingola.

²⁶ Bi ñinbiaciandi den kpedi Ki do hali tanpoli, Ki guani ki ji hali tiipo, Hali yaala ke bi jigi den cie, Ke bi naani mo yugi.

²⁷ Ki nunfufuuga n yen cuo ba, Ban yaa jadibi nani o dañogaado yeni, Bi tuonsoanbanma kuli mo n bodi.

²⁸ Bi paboanli nni, bi den buudi o Diedo kani. Ke o den faabi ba leni bi paboanli.

²⁹ O den teni ke ku tafaaciangu yeni duani salam, Ki teni ke a ñingola mo duani suo.

³⁰ Bi pala den mangi leni Lan den duani maama suo. O Diedo mo den pegidi ki gedini ba Ban bua ki jiidi yaa jaali po.

³¹ Ban pagi o Diedo kelima o ŋanbili po, Leni wan tieni yaa bancianma bi nisaaliba po.

³² Ban pagi o o niba taanli siiga, Ki teni ban kpiagi o a nikpela taanli nni.

³³ O den teni ke i kpenciami kpandi fanpienma, Ke a ñinbuna mo kpandi ki tua tinkuonga.

³⁴ Yaa diema n bi pia ti bugidi Kpandi tinwagili, Kelima mi diema niba biadima po.

³⁵ O teni ke mi fanpienma kpandi Ki tua kpenciamu, Ki teni ke ki tinkuonga mo kpandi Ki tua ñinbuna.

³⁶ O teni ke mi koma n pia yaaba ye likani, Ki teni ke bi maa bi diedi ki ye likani.

³⁷ Bi coagi bi kuani, ki ŋuu i duventiidi, Ke yi luoni hali bonŋanla.

³⁸ O Diedo seligi ba, Ki teni ke bi yabidi hali boncianla, Ki naa teni ke bi yandi mo wadi.

³⁹ Bi nitianba wadi ki go ye i fe nni, Kelima mi yebiadima leni fala N mabini ba maama po.

⁴⁰ O teni ke bi fali bi bulicinba, Ki go teni ke bi puagi yaa fanpienma N ki pia bianu nni.

⁴¹ Ama o ñandi taliginba fala nni, Ki teni ke bi diedi pili nani i yankuli yeni.

⁴² Bi niteginkaaba yen le la bi pala n mangi, Ama yaaba n ki tiegi wani, Li yen luoni bi ñoana.

⁴³ Yua n pia mi yama n faami li po, Ki bandi o Diedo tuonŋama.