Pisomi 105 - U TIENU MAAMA TILI 2013

Pisomi 105 U Tienu teginma togida

¹ Pagi mani o Diedo, dondi o mani! Teni mani i nilanbuoli n bandi, Wan soani yaa tuonciama!

² Yiini mani o po, pagi mani o yeli! Kpaagi mani wan soani yaa tuona Ke a pia ki lidiga po!

³ Jigini mani yi yula kelima o yeli Yaali n gagidi ki ŋani yeni po! Yaaba n lingi o Diedo kuli, Yaa pala n mangi!

⁴ Pegidi mani ki nuali o Diedo U Paalu Daano, Lingi o mani u yogunu kuli.

⁵ Tiadi mani wan soani yaa tuona, Ke a pia ki lidiga, O bancianma leni wan jia yaa buudi po.

⁶ Yinba o naacemo Abalahama puoliŋuani, Yinba Jakob bijaba wan gandi yaaba,

⁷ Wani Li Miali Diedo n tie ti Tienu, O ja o buudi ki tinga kuli po.

⁸ O tiadi yaa yogunu kuli, Wan den kuani yaa ŋantaado po, Ki tiadi o maama po hali nifiima tudili.

⁹ O tiadi wan den kuani yaa ŋantaado Leni Abalahama leni wan den poli Ki niani Isaaka yaala po.

¹⁰ O den teni ke li tua mabilikaama Jakob po, Ki tua wani Isidayeli po yaa ŋantaado n ki pia fidima,

¹¹ Wan den yedi yaa yogunu: «N baa pa yi Kanana diema, Man tua yin die yaa tinga.»

¹² Bani, bi coali ki den fuu, Bi den li tie nilanbe waamu mi diema nni.

¹³ Bi den ña nibuolu kani ki puodi nibuoto, Ki ña diema nni ki puodi dietoama.

¹⁴ Ama waa den tuo ke niloba kuli n faligi ba, O den funi leni bi badiba bi po ki yedi:

¹⁵ «Da sii mani n nigagidikaaba yeni, Ki da tieni n saawalipuaba mo yaala n bia!»

¹⁶ O den soani mi koma mi diema nni, Ki bolini bi niba bonjekaala kuli.

¹⁷ O den soani bi liiga jayendo, Lani n tie Josefi, Ban den kuadi yua nani o yonbo yeni.

¹⁸ Bi den kpaa o taana ti kpaadi, Ki lani o tuli nni ti kudi,

¹⁹ Hali wan den pua yaa saawalo N tieni yaa daali ke o Diedo maama Saa o po i moamoani.

²⁰ O bado den teni li ñoamabonli Ke ban ŋaa o, I nibuoli yudaano den teni ke bi lodi o.

²¹ O den teni ke o diedi o diegu, Ki tua wan den pia yaala kuli canbaa,

²² Ki teni ke o gobidi o bado koanbala Nani wan bua maama, Ki teni ke a nikpela baa mi yanfuoma.

²³ Li yaa puole ke Isidayeli den cua Ejipiti diema nni, Wani Jakob yeni den kali Kam diema yeni niinni.

²⁴ O Diedo den puni o ti madi hali boncianla, Ke o buolu den baa u paalu Ki cie bi yibalinba.

²⁵ O den lebidi Ejipiti yaaba yantiana, Ke bi den nandi o Diedo buolu, Ki den luni o naacenba i janbi.

²⁶ Lane ke o den soani o naacemo Musa Leni Alono wan den gandi yua.

²⁷ Bi den tieni mi bancianma Leni wani U Tienu paalu bi niba siiga. Bi den tieni yaa bonla n pia Ki lidiga Kam diema nni.

²⁸ O den soani li biigili Ke li den tua ñiagu, Ke oba kuli ki tuo ki baa yie o maama.

²⁹ O den lebidi bi ñima ke mi tua soama, Ki den kpa bi jami mo.

³⁰ Bi diema den gbie leni a loanda Hali ke a den do ki koa bi badiba Dieduada nni.

³¹ O den li maade ke i sibiadi cua, Ke i juumi mo den jiidi mi diema kuli po.

³² O den soani a tatana ke a tua bi taaga, Ki mi u mupienu bi diema po.

³³ O den bolini bi duventiidi leni bi kankandi, Ki kua bi diema tiidi kuli.

³⁴ O den li maade ke i naaci Leni a dondoba den cua kaa pia coali,

³⁵ Ki den ŋmani bi diema muadi kuli, Ki bolini bi tinga bonluonkaala kuli.

³⁶ O den kpa bi diema nni bonjakpiala kuli, Ban den kpa mali yaaba bi gbanmanu siiga.

³⁷ O den teni ke o niba ñani Ki tugi wula leni ŋanjilifa. O buolu siiga, oba kuli ki den cuoni ki jadibi.

³⁸ Ejipiti yaaba pala den mangi leni bi ñama, Kelima ban den pia Isidayeli yaaba po Yaa jawaandi den wudi bi gbani.

³⁹ O den tandi ku tawaligu ke ku ŋoagini ba, Ki teni ke u mu yendi ba ku ñiagu.

⁴⁰ Ban den mia o, O den jiini bi po a ñinkpakpala. O den dindi ba leni tanpoli jiema.

⁴¹ O den cibi ku tangu ke mi ñima ñani, Ki puubi ki yadi nani U kpenciamu yeni mi fanpienma nni.

⁴² O den tiadi wan den niani, O naacemo Abalahama yaa ñoaniangagidiko po.

⁴³ O den teni ke o niba ñani Leni li pamancianli. Wan gandi yaaba mo den ñani leni i yigimi.

⁴⁴ O den puni ba dietoama tinmu, Ke bi dini nibuotoe tuonli ñuadi.

⁴⁵ Lani, bi den kubi o mabilikaama, Ki go kubi o bali maama. Pagi mani o Diedo!