O Yanfuodaano 9 - U TIENU MAAMA TILI 2013

Bi niba kuli caa kaanyendu yo

¹ N kpaagi min laa yaala kuli po. N sua ke bi niteginkaaba, bi yanfuodanba leni bi tuona kuli ye U Tienu nuu nne. O nisaalo ki bani mi buama ki bagi ki nanga. Laa bonla kuli pendinni o banma.

² Li bonla kuli tie yenma bikuli po: Yaala n baa tieni o niteginka, baa tieni o nibiado. Yaala n didi baa o niŋamo, baa baa o nibiado. Li bonla kuli tie yenma. Laa pia gagidima yua n padi a pada leni yua n ki padi siiga. Paadima ki ye o niŋamo leni ti tuonbiadi daano siiga, yua n polini leni yua n jie li poli siiga.

³ Yaa bonbiadila n ye ne n tiendi ki tinga bontienkaala kuli nni: Lani n tie ke bonyenla n ye ki baali bi niba kuli. Bi nisaaliba pala gbie leni mi biadima leni mi gaadima bi miali dana nni kuli. Lani kuli yaa puoli, bi baa kpe.

⁴ Yua n pia li miali wani pia wan daani yaala, kelima o sangbanfuodo cie o yangbankpiemo.

⁵ Yaaba n fo bani ke bi baa kpe. Ama bi tinkpiba wani ki bani liba kuli. Baa pia kuli ban go daani yaala, kelima bi sundi bi po.

⁶ Bi buama, bi nanga leni bi nunponli kuli taani ki kpe leni ba, bi kan go baa ŋantaadoba kuli leni yaala n tiendi mi tinfanma nni.

⁷ Lanwani, gedi ki yaa di a jiema leni pamanli, ki yaa ñu a daama ke a pali mani, kelima U Tienu mali ki saa a tuona po moamoani no.

⁸ Lan tie yaala kuli nni, ŋan yie a baditiadi, tulale mo n da poadi a yuli po.

⁹ Mangi a pali leni ŋan bua yaa pua U Tienu n puni a yaa danjenmu mi tinfanma nni, kelima lani n tie a ñuadi, ŋan laadi yaa fala ki tinga nni kuli po.

¹⁰ Ŋan baa fidi ki tieni yaala leni a fidu kuli, ŋan tieni la, kelima tuonli, bi kpaagili, bi banma, bi yanfuoma naa ye bi tinkpiba kaanu ŋan caa nan po yeni.

Mi yanfuoma ki pia todima yogunu kuli

¹¹ N go laa bonla boncianla mi tinfanma nni: Yaaba n jaligi ki cie, ka gaani yogunu kuli liiga mi nuama nni, a jakoanda mo ka paadi bu toabu nni yogunu kuli. Yaaba n pia mi yanfuoma ki cie, ka pia mi jiema, yaaba n fani ki cie, ka tie piada, a yanfuodanciama ka pia ti kpiagidi. Yaala n ŋani leni yaala n bia laadi bikuli,

¹² kelima o nisaalo naa bani fala n baa cua o kani yaa yogunu. Nani u taalu n yen cuo o jamo maama, bi nani ku diagu n yen cuo o nuano maama, o nisaalo yen le ke fala ludi o ki baa o yene.

¹³ N go laa mi tinfanma nni yaa yanfuobuolu n tie ne ki sua ke mi tie bonmoanla.

¹⁴ Dobiga den ye ke ki niba ki fuu. Yaa bado n pia u paalu den cua ki baa ka. O den teni ke o toatieba lindi ki cebini ka, ki tieni i wuonkaani ki kani ki wuoni.

¹⁵ U dogu yeni niinni den pia yaa nilo n tie luodo, ama ki pia mi yanfuoma. O den baa fidi ki faabi u dogu yeni leni o yanfuoma. Ama oba kuli ki den tiadi o po.

¹⁶ Lanwani, n yedi: Mi yanfuoma cie mi jama. Ama yanfuodaano yaa tie luodo bi niba baa fali o, bi kaa cengi o maama.

¹⁷ A yaa cengi yanfuodaano, yua n maadi dindini, li cie ŋan cengi yaa bado n maadi leni bi yanluodanba ki tangi.

¹⁸ Mi yanfuoma cie ti toatiadi, ama ti tuonbiadi daano yendo bolindi li bonŋanla boncianla.