O Yanfuodaano 4 - U TIENU MAAMA TILI 2013

Yaala n ki tiegi mi yema nni

¹ N go laa yaa biadima kuli n tiendi mi tinfanma nni. Ban faligidi yaaba mua, ama oba kuli ki todi ba. Yaaba n duoliti ba yeni n die u paalu. Lani yaa po, oba kuli kan fidi ki todi ba.

² N yedi ke yaaba n kpe mo pia li pamanli ki cie yaaba n da fo.

³ Ama ban ki mali yua, ke o laa yaa tuonbiada n tiendi mi tinfanma nni mo, pia li pamanli ki cie bikuli.

⁴ N go bandi ke nunponli n teni, ke o nilo tuuni ki laadi fala ki baadi. Lani, moko tie bonpendikaala. Li tie nani o nilo n ŋua ke o baa cuo u faalu.

⁵ O yanluodaano yen poali poali o nii ki yaa di o yuli.

⁶ Mi fuodima waamu cie yaa tuoncianli n ki pia fuomiba.

⁷ N didi go laa bontoala ke li tie bonpendikaala mi tinfanma nni.

⁸ A baa le nilo ke o ye obebe, waa pia lielo, waa pia biga, waa pia naataanu, ama ki nan tuuni ki kan cedi. O li bua ki yaa baadi mi piama ki pugide, ba ke o buali o yuli wan tuuni yua yaa po, ki naa tiendi liba kuli ki mangidi o pali. Lani moko tie bonpendikaala, yanyagikuondi.

⁹ Nibilie cie niyendo, kelima bi tuonli panpaani yabi.

¹⁰ Bi siiga yendo yaa ŋmadi ki baa, o lielo baa fiini o. Ama yua n ye obebe ki ŋmadi ki baa, kaa pia yua n baa fiini o, wani laa la n yeni.

¹¹ Yi yaa taa ki dua nibilie moko, yi wulitonma baa yaa kua yiyaba ki tongidi yi gbani. Yua n ye obebe mo nan baa tongi o gbanu lede?

¹² Nilo baa fidi ki ñii ki kaani niyendo, ama bi yaa tie nibilie wani, o kan fidi ba. Toanditaa baabu kan cie faala po.

¹³ Yaa biga n tie luodo ki nan pia mi yanfuoma, cie yaa bado n kpeligi ki nan luo mi yama, kaa go tuodi tundi.

¹⁴ Laa biga baa fidi ki ña li kpaadidieli nni ki je li bali. Yua n kaa li bali po moko, li fidi ke bi mali o ke o tie luode.

¹⁵ N laa yaaba n fo ki ye mi tinfanma nni, ke bi taani yaa biga n lebidi o bado ki gaa o kaanu yeni po.

¹⁶ Wan den tugi yaaba yaa yuli yeni ki den pia bianu. Ama li nan fidi ke o puoliŋuani kan baa li ñuadi, kelima lani moko didi tie bonpendikaala. Li go tie nani o nilo n ŋua ke o baa cuo u faalu yeni.

Ŋan da maadi ki pendi

¹⁷ A yaa caa U Tienu diegu po, ŋan yaa faami. Ŋan yaa caa ki pia yaa yantiali n tie ki cenge. Yeni n cie ŋan ban padi li yanluodanpadili. Bi yanluodanba ki bani ke bi tiendi yaala n bia.