O Yanfuodaano 3 - U TIENU MAAMA TILI 2013

¹ Yaala n tiendi mi tinfanma nni, bonla kuli pia li yogunu yo.

² Ti madi yogunu ye, Mi kuuma mo yaa yogunu ye. Li tiŋuuli yogunu ye, Li tiŋabili mo yaa yogunu ye.

³ Ki kpa yaa yogunu ye, Ki buu mo yaa yogunu ye. Ki mudi yaa yogunu ye, Ki maa mo yaa yogunu ye.

⁴ A bubula yaa yogunu ye, Ti laadi mo yaa yogunu ye. Ki yaa mua ki ñiidi yaa yogunu ye, Ki yaa jeli ki ciaga mo yaa yogunu ye.

⁵ Ki lugidi a tana yaa yogunu ye, Ki gandi a tana yaa yogunu mo ye. Mi buama gobinma yaa yogunu ye, Ki yie mi gobinma mo yaa yogunu ye.

⁶ Ki lingi yaa yogunu ye, Ki biani yaa yogunu mo ye. Ki kubi yaa yogunu ye, Ki lu yaa yogunu mo ye.

⁷ Ki padi ti tiadi yaa yogunu ye, Ki hali mo yaa yogunu ye. Ki yaa ŋmini yaa yogunu ye, Ki maadi mo yaa yogunu ye.

⁸ Mi buama yaa yogunu ye, Ki nanga mo yaa yogunu ye. Bu toabu yaa yogunu ye, Mi yanduanma mo yaa yogunu ye.

⁹ Yua n tuuni ŋmani be o fala nni?

¹⁰ N laa U Tienu n puogi bi nisaaliba yaa tuonli, ke ban yaa tuuni.

¹¹ O tuuni o tuona kuli li yogunu. O kuani bi nisaaliba yama nni, ban bandi yaala n pendi leni yaala n kpendi. Ama bi naa fidi ki bandi o tuona kuli, ki cili mi cilima ki yaa caa hali mi juodima.

¹² Min bandi yaala tie ke yaala n ŋani o nilo po ki cie, wan mangi o pali, ki ŋanbi o yema o miali dana nni.

¹³ O nilo n je, ki ño, ki baa o tuonli ñuadi, lani n tie U Tienu paabu.

¹⁴ N bandi ke U Tienu n tiendi yaala kuli, baa yaa ye hali yaa yogunu kuli. Laa pia yaala n baa pugini likani, laa pia yaala n baa wadi mo. U Tienu tiendi yeni, ki bua bi niba n yaa fangi o.

¹⁵ Yaala n ye leni yaala n da baa tieni kuli den kpa ye. U Tienu tendi ke yaala n pendi lebidi ki goa.

Mi kuuma tie bonla kuli juodima

¹⁶ Min go laa yaala ki tinga nni nne: Lan bili ke ti buudi n yaa ja naani, mi biadima ye lankane. Mi teginma n bi baa yaa ye naani yeni, mi biadima go ye lankane.

¹⁷ N den yedi n pali nni: U Tienu baa bu leni yua n tiegi, ki go bu leni yua n bia mo, kelima bonla kuli pia li yogunu. Bi baa jia bontienkaala kuli buudi.

¹⁸ N den yedi n yama nni, yaala n tie bi nisaaliba po, U Tienu baa biigi ba ban le ke baa cie ti yandi,

¹⁹ kelima o nilo juodima leni ki yanga yaa juodima kuli tie yenme. Bikuli fuoma yenma, bi siiga yuakuli baa kpe. O nisaalo ki cie ki yanga liba kuli, kelima liba kuli ki tie puu.

²⁰ Li bonla kuli baa juodi kaanyendu: bonla kuli tagi leni ti tande, bonla kuli mo baa guani ti tandi nne.

²¹ Ŋme bani o nisaalo fuoma n yaa baa do tanpoli, ki yanga yaama mo n jiidi ki tinga nni?

²² Min laa ke yaala n ŋani o nilo po ki cie, tie wan mangi o pali leni o tuonli ñuadi. O biinu n yeni, kelima oba kan guani o, wan le yaala n baa yuandi ki tieni o puoli.