O Yanfuodaano 2 - U TIENU MAAMA TILI 2013

¹ N den yedi n yuli: «N baa biigi ki le li pamanli n tie yaala, n baa le mi yemanma n tie yaala.» Jam! Lani, moko tie fanma bebe.

² N yedi ke ti laadi tie ledima, li pamanli mo ki pia kuli lin baa cuani yaala.

³ N den bili n yama nni, ke n baa mangi n pali li dañoli nni, ki togidi bi yanluodanba yema, ama ki nan yaa die n yuli. N den bua ki bandi yaala n ŋani bi nisaaliba po, ban baa tiendi yaala mi tinfanma nni, bi miali dana nni.

⁴ N den tieni yaa tuonciama n tie ne: N maa n yuli po a diena, ki ŋuu i duventiidi,

⁵ ki tieni salidinginba leni i tikuani ki ŋuu lienni duventiidi kuli.

⁶ N den gbiidi ti ñinbuodi ki baa yaa baadi mi ñima ki joagini n tiidi siiga a tibila.

⁷ N den baa a jatuada leni a puotuada ki pugini min den kpa pia yaaba po. N den baa a yangbenga leni ti yanbidi boncianla ki cie yaaba n den kpiani nni Jerusalemi dogu nni.

⁸ N den taani ŋanjilifa leni wula kuli, ke li tie min die yaa badiba leni yaa diema kuli yaa ŋalimani. N den baa bi yanyinba, bi jaba leni bi puoba ke bi kpendi ki mangidi n pali. N den baa nisaalo n baa baa yaala ki mangi o pali kuli, ki baa bi puoba boncianla.

⁹ N den tua niciamo ki cie yaaba n den kpiani nni Jerusalemi dogu nni kuli. N den baa ki pia mi yanfuoma mo.

¹⁰ N nuni n den laa yaala ke li kua n yama kuli nni, mii den muni n yuli la. Mii den muni n yuli pamanliba kuli. N pali den mani n tuonli kuli po. Lani n den tie n ñuadi lienni.

¹¹ N den kpaagi ki laa, ke o nilo ki ŋmani liba kuli wan tuuni yaa tuona mi tinfanma nni. Lani n den kpaagi min soani yaa tuona kuli leni min den laa yaa fala ki soani a kuli po. N sua ke likuli tie bonpendikaala, ki tie nani o nilo n ŋoadi ke o baa cuo u faalu yeni.

¹² N den bua ki bandi mi yanfuoma n cie mi yanpiima bi mi yanluoma maama. N den buali n yuli, yua n baa ŋoadi n puoli, ki tua bado yaa baa tieni yaala n cie yaaba n kpiani o n den tieni yaala.

¹³ N den laa ke mi yanfuoma cie mi yanpiima nani mi yenma n cie li biigili maama.

¹⁴ O yanfuodaano nuni nua, ama o yanluodaano wani tulibe. Die n bani ke bani bonbilie yeni kuli baa juodi yenme.

¹⁵ Lane ke n yedi n yama nni: «Nani mini leni o yanluodaano kuli n baa juodi yenma yeni, min den pia mi yanfuoma ki cie o yeni, li todi be?» N yedi n yama nni ke lani moko tie bonpendikaala.

¹⁶ Bi kan yaa tiadi o yanfuodaano bi o yanpiidaano po hali yaa yogunu kuli. O yanpiidaano baa kpe, o yanfuodaano moko nan baa kpe. Danaba siiga bebe bi baa sundi bani bonbilie yeni kuli po.

¹⁷ Lanwani, n yama den ñani mi yema nni, kelima yaala n tiendi mi tinfanma nni kuli gundi boncianla ki tie bonpendikaala, nani o nilo n ŋua ke o baa cuo u faalu yeni.

¹⁸ N den nani min laa fala ki soani yaa tuona kuli, kelima n baa ŋaa likuli yua n baa ŋoadi n puoli yaa po yo.

¹⁹ Ŋme bani o yaa baa yaa tie yanfuodaano bi yanpiidaano? Wani n nan baa diedi min soani ki baa yaala leni n yanfuoma n teni ke n baa yaala kuli mi tinfanma nni. Lani moko tie bonpendikaale.

²⁰ Lanwani, n gbanu wudi fanma. Min duoli n yuli ki soani yaa tuona mi tinfanma nni kuli tie fanma.

²¹ Diidi mani, o nilo soani leni mi yanfuoma leni mi banma, ke li cuoni bonŋanla mo. Ama o nan baa ŋaa o bontienkaala yeni kuli, nitoa yua n ki soani lienne n taa. Lani moko tie bonpendikaala. Laa ŋani!

²² Yeni mo daa, o nilo n duoliti o yuli ki tiendi wan bua ki tieni yaala mi tinfanma nni yeni, li pia o po be yaa todime?

²³ O miali dana kuli tie o po yanyagidi leni fala bebe. O tuonli ki pia fuomiba. Ku ñiagu mo o didi kan fuodi. Lani moko tie bonpendikaala.

²⁴ O nilo yemanma wani tie wan je, ki ño ki baa o tuonli ñuadi. N sua ke U Tienu n puuni laa yemanma,

²⁵ kelima oba kan fidi ki je bi ki mangi o pali U Tienu yàá puni o la.

²⁶ Yeni de! U Tienu puuni wan bua yua mi yanfuoma, mi banma leni li pamanli. Ama o tendi ke ti tuonbiadi daano wani n baadi ki taagi yaa ŋalimano kuli, tie U Tienu pali n mani yua yaa po yo. Lani moko tie bonpendikaala, ki tie nani o nilo n ŋua ke o baa cuo u faalu yene.