Ose Tili 9 - U TIENU MAAMA TILI 2013

Li paboanli jiema

¹ Isidayeli yaaba, da tiendi mani i badi, Ki mangidi yi pala nani i nilanbuoli yeni, Kelima yi ŋaa yi Tienu, Ki puni yi yula mi conconma. Yi bua ki yaa baadi li panpaani, Yi ŋalikama jali kuli nni.

² Ama yi kan go baa ŋalikama leni mi kpama Lan dagidi yi, O duvenpaano moko baa poadi yi.

³ Bi kan yaa kaa o Diedo diema nni, Bani Isidayeli buolu baa guani ki gedi Ejipiti. Bi baa n yaa di yaa jiema n joagini Asiiri diema nni.

⁴ Bi kan go cabi duven o Diedo po. Ba bi yaa padi, o kan gaa bi po. Bi jiema baa yaa tie bi po nani li paboanli jiema yene, Yua n dini ma kuli baa joagini o yuli. Bi jiema baa yaa tie bi tugidi po bebe, Bi kan kuani ma o Diedo diegu nni.

⁵ Mi jaanma dana yeni yaa ti pundi, Mani o Diedo jaanma yeni, Yi baa tieni lede?

⁶ Diidi, Isidayeli yaaba baa ña bi diema nni, Kelima bi yibalinba mudi bi diema. Ejipiti yaaba baa taa ba ban yaa taa ki ye. Mofi dogu baa tua ban baa yaa piindi bi tinkpiba naani. Ti moabiaditi baa fii ki pini bi ŋalimanmoano, Ti konkondi mo baa fii ki loli bi diedi nni. Yinba Isidayeli yaaba n bandi mani line:

Isidayeli yaaba fii ki yie U Tienu saawalipualo po

⁷ «U Tienu n baa waani Isidayeli yaaba fala yaa dana pundi, Ti buudi dana pundi, Mi biadima panpaani dana mo pundi.» Bi baa bandi la. Bi tuonbiadi yabinu leni bi nanga teni ke bi tua: «U Tienu saawalipualo yama bodi, U Tienu n soani wani yua yeni tie nani o gaado yeni.»

⁸ U Tienu ye leni yua n se ki guu Efrayimi buolu, O saawalipualo yeni, Ama bi ŋua ki dia o ti dadi o sani nni kuli. Ba o Tienu diegu nni, bi fii ki sedi o po.

⁹ Bi feli ti tuonbiadi nni, Nani lan den tie maama Gibeya dogu yogunu. O Diedo baa tiadi bi tagili po, Ki waani ba fala kelima bi tuonbiadi po.

U Tienu yama sii Isidayeli yaaba

¹⁰ U Tienu yedi: «Min den laa yinba Isidayeli yaaba, Li den tie nani o nilo n laa i cabi li fuasieli nni yeni. Min den laa yi yaajanba, Li den tie nani o nilo n laa a kankankpiala bu kankanbu po yene. Ama ban den pundi Baali-Peori dogu nni, Bi den ŋaa nni ki ŋoadi i buli, yaala n tie i fe bonla. Bi den tua cancaginniba nani ban den bua yaa bulo N den tie cancaginbonla maama yeni.

¹¹ Efrayimi buolu kpiagidi baa yugi nani ki nuanga yeni. Madi kan go yaa ye, Tugitaama kan go yaa ye, Ba ki taa lan yie kan yaa ye,

¹² Ba bi yaa baa ki wubi bitiama, N baa fie bi ciba ke bi daa pundi jaba. Bi baa le fala, min baa foagidi leni ba, Ki ŋaa ba yaa yogunu.

¹³ N yaa diidi ki tiegi Tiiri po, N laa ke Efrayimi buolu kaa ki tinŋanga nni. Ama bi baa gedini bi bila yaaba n baa kpa ba kani.»

¹⁴ O Diedo, n baa mia ŋa ŋan tieni laa niba be? Ŋan ŋaa bi puoba li tuguñali leni a biitaba.

¹⁵ Bi biadima kuli den doagidi Giligali dogu nni, Lankane ke n den cili ki yie ba. N baa deli ki ñani ba n diema nni, Kelima bi tuona n bia maama po. N kan go yaa bua ba. Bi yudanba kuli li tie niyiekaabe.

¹⁶ Li nandi Efrayimi buolu, Bi jiini kuodi, Bi kan go luoni. Ba bi puoba yaa mali bila mo n baa kpa ba. Bani, ban bua yaaba leni bi pala kuli yeni.

¹⁷ N Tienu luni ba, Kelima baa cengi o. Bi baa yadi ki yaa puagi i nilanbuoli nni.