Ose Tili 8 - U TIENU MAAMA TILI 2013

Yua coagi u faalu baa yendi tafaaciangu

¹ Piebi mani li naatuntunli! Yibalinba kpendi ki baa cibi o Diedo diegu, Nani jiebani n yen cibi maama yeni, Kelima n niba fidi min kuani leni ba yaa ŋantaado, Ki yie n bali maama mo.

² Bani Isidayeli yaaba kpaani ki miadi nni, ki tua: «Ti Tienu, tinba Isidayeli yaaba ti bani a!»

³ Ama Isidayeli yaaba nani yaala n ŋani. Lani yaa po n teni ke bi yibalinba baa yaa ŋua ki deli ba.

⁴ Bi dindi bi badiba kaa buali nni min nua yaala, Bi dindi bi yudanba kaa pua nni saawali. Bi taani bi ŋanjilifa leni bi wula ki duadi i buli. Li tie lani yaa po yo, ke bi baa bodi.

⁵ O Diedo yie yinba Samari yaaba N kpiagidi yaa naabiduadikaaga yeni. N pali fii yi po, Kelima yi kan fidi ki kan tieni janda.

⁶ Ki naabiga yeni ñani yinba Isidayeli yaaba kane, Nisaalo n duadi ka, Kaa tie U Tienu. Bi mudi Samari naabiga yeni yomi yomi.

⁷ Yin den coagi u faalu yeni, Yi baa yendi ku tafaaciangu, Ba ŋalikama kankagiyenli kan pudi, Yaala n pudi mo kan tieni bima, Ba li yaa tieni mo, bi nilanba n baa je.

⁸ Isidayeli yaaba bodi. Moala, bi ye i nilanbuoli siiga Nani yaa tiagu n ki pia fuoma yeni.

⁹ Bi puagi ki lindi nani yaa fuaŋunbo n ye o bebe yeni. Bi fii ki gedi ki ban mia Asiiri yaaba mi todima, Bani Efrayimi buolu puuni bu paabu Ki bua ki baa bi buakaaba.

¹⁰ Ama ba ke bi puuni nibuotoe bu paabu, U yogunu pundi ke n baa taani ba, Ki waani ba fala. Li kan waagi ke bi baa le fala Leni bi badiba badiciamo mabinga.

¹¹ Efrayimi buolu maa a padibinbina boncianla, Ki bua ki yaa tiendi ti tuonbiadi. A padibinbina yeni teni, Ke bi kuani bi yula ti tuonbiadi nni.

¹² Ba n yaa diani bi po n ñoamabonbilikaana boncianla, Bi baa nuali a nani li boncanla yene.

¹³ Bi padi n po ti yandi, Ki ŋmani li nandi. O Diedo pali ki mani li po. N tiani bi biadima, Ki baa waani ba fala kelima bi tuonbiadi po. Bi baa guani ki gedi Ejipiti.

¹⁴ Isidayeli yaaba sundi yua n tagi ba, Ki maa a dieŋama, Juda yaaba mo maa i bilinciami Ki lindi i dogi boncianla. Ama n baa soani u mu bi dogi nni, Ki teni wun je bi dieŋama.