Ose Tili 7 - U TIENU MAAMA TILI 2013

Isidayeli yaaba tuonbiadi

¹ Min den bua ki faabi Isidayeli yaaba yaa yogunu, Efrayimi leni Samari tuonbiadi kuli den doagidi. Laa diema nni bi tiendi i janbi, Ki mudi a diena ki koa ki su, Ki ja bi niba i sani nni.

² Baa kpaagi bi pala nni, Ke mini U Tienu tiani, Ban tiendi yaa biadima kuli. Ama moala bi tuonbiadi lindi ki cebini ba, N nua bi cidi kuli.

³ Bi biadima nni bi boandi o bado, Ki lengidi a koanbala mo bi nunfanbu nni.

⁴ Bikuli puni bi yula mi conconma po, Ki tongi nani u dupenpuakaanu yeni, O dupenpualo n ki ji tongidi yuu, Ki cili hali wan nugi mi yoma, Ki pundi hali man pili ki dagidi yaa yogunu.

⁵ O bado badu daali, Bi yudanba yen ño duven hali ki yiagi, O bado yen co a ñuañuada nuu nni.

⁶ Yaaba n janbidi yeni pala tie Nani u dupenpuakaanu yene, Bi pabienli yen dua ki bugili. Li yaa faa lin pebidi nani ku moasiangu yeni.

⁷ Bikuli tongi nani u dupenpuakaanu yene, Bi kpaani bi yudanba, Ki tudi ki lu bi badiba, Ama bi siiga ba yendo ki lingi n todima.

⁸ Isidayeli buolu kali ki taani leni i nilanbuoli, Ki tie nani yaa maadili n kaa lebidi yeni.

⁹ Bi nilanba gbeni bani Isidayeli buolu fidu, Ama bi naa faami lipo. Bi yudi mali ki pendi, Ama bi naa tiadi lipo.

¹⁰ Bani Isidayeli yaaba japaadi fii ki sedi bi po. Ba leni lani kuli, baa lebidi bi pala Ki guani o Diedo bi Tienu kani, Ki naa lingi o mo.

¹¹ Efrayimi buolu tieni Nani yaa kpaajiega yaa yama n pii, Yaaga yaa yuli n kpe yeni. Bi miadi Ejipiti yaaba mi todima, Ki nan go caa Asiiri yaaba po.

¹² Ama ban fii ki caa yaa yogunu, N baa dia ba u taalu, Ki teni ban baa lienni nani ti bonyugiditi yeni. N baa waani ba fala, nani min den tuodi Ki waani bi nitaanli maama.

¹³ Fala baa ba kelima bi sani ki foagidi leni nni. Bi baa bodi kelima bi fiini n po mi yiema. N den bua ki faabi ba, Ama bi nan pua nni mi faama.

¹⁴ Bi yaa dua bi duani po ki buudi, Baa buudi ki miadi nni leni bi pala kuli ka. Bi ja biba, ki tama ke yene bi baa baa Ŋalikama leni o duvenpaano boncianla, Ama yeni bi fiini n po mi yieme.

¹⁵ Mini n den wubi ba ki puni ba u fidu, Die bani wani li pia n po yaa yantiana n bia bebe.

¹⁶ Bi gbagidi ki nua ban baa baa mi todima naani, Ama baa diidi mini yua n ye tanpoli. Bi tie nani li dabangolinli yene. Bi baa kpa bi yudanba leni mu jugisiemu, Kelima bi japaamaama po. Bi baa tua ñuali bonla Ejipiti yaaba po.