Ose Tili 6 - U TIENU MAAMA TILI 2013

Isidayeli yaaba bua ki guani U Tienu kani

¹ Yi tua: «Cua mani tin lebidi ki guani o Diedo kani, Kelima o den dadi ki toadi toadi ti, ama o baa paagi ti, O den poagili ti, ama o baa fini ti po ti nala.

² Danalie siiga o baa pa ti li miali, Li dataali mo o baa pa ti u fidu, tin yaa ye o nintuali.

³ Tin moandi mani ki bandi o Diedo. Nani lan ki pia kuli tama ke u yienu baa faa Ki pudi ku tiŋaagu maama yeni, U Tienu cuama moko tie yene. O baa cua nani ki taludikaaga yeni, Ki kuugi ki tinga gbanu, Nani ki siakuantaaga n yen cua, Ki kuugi ki tinga maama yeni.»

⁴ Ama U Tienu guani ki yedi: «Yinba Efrayimi leni Juda buolu, N baa tieni yi be? Yi buama tie n po Nani mi tiŋaamanma yaama n yoagi tontoni yeni.

⁵ Lani n teni ke n pua yi leni n saawalipuaba maama, Ki kpa yi leni n ñoamaama. N buudi baa ludi ki cua nani mi yenma yeni.

⁶ Yaala n tiegi mani n po ki cie a pada. Ki bandi U Tienu mo mani ki cie a padijuukaana.»

Isidayeli yaaba tuongunda

⁷ Ama yi den biidi o ŋantaado, Nani bi nisaaliba n tieni maama, Lankane, yi janbi nni.

⁸ Galaadi dogu gbie leni bi nibiadiba, Yaaba n faadi mi soama wulima.

⁹ Sikemi dogu sanu nni, bi kopadicianba tie sanjiaba Ki wuo ki guu bi niba, ki kpaani ba. Li tie yaa bonla n gundi.

¹⁰ N laa cagindibaane Isidayeli yaaba siiga, Lankane ke Efrayimi conbi, Ke Isidayeli yaaba mo joagini bi yula.

¹¹ Yinba Juda yaaba moko, N bili u yogunu ki baa waani yi fala, N yaa guani ki kpeninni n niba Yaaba n den ye ti yonbidi yaa yogunu.