Ose Tili 5 - U TIENU MAAMA TILI 2013

Isidayeli yaaba gobidikaaba baa guli ba

¹ Cengi mani line yinba bi kopadicianba, Yinba Isidayeli yaaba kuli, cengi mani. Yinba badidiegu yaaba, diadi mani yi tuba ki cengi. Ti buudi jiama tie yi yaa tuonle, Ama Misipa dogu nni, yi den tua diagu, Tabori juali po mo, yi den tua taalu n niba po.

² Sitimi dogu nni mo, yi den tua bi po buoñuangu. Ama n baa teni yikuli n le fala.

³ N bani yinba Efrayimi buolu, Yinba Isidayeli yaaba mo ki tie n canba, Kelima Efrayimi buolu yie kaa ŋua nni, Isidayeli yaaba mo cagini bi yula.

⁴ Bi tuona kan tuo ban lebidi Ki guani bi Tienu kani, Mi conconma yantiali diedi ba, Ke baa go bani o Diedo.

⁵ Isidayeli yaaba japaadi fii ki sedi bi po, Isidayeli leni Efrayimi buolu kuli baa tuudi ki baa, Kelima bi tagili po. Juda buolu baa taani leni ba ki tuudi ki baa.

⁶ Bi baa taa bi yanbidi leni bi yanciandi, Ki ban lingi o Diedo, Ama bi kan le o, Kelima o pidi ki luni ba.

⁷ Bi janbi o Diedo ki mali a kpiaba. Moala li kan cie ŋmayendo, Bi baa bolini ba leni bi piama.

Bu toabu fii Isidayeli leni Juda yaaba siiga

⁸ Piebi mani li naatuntunli Gibeya dogu nni, Piebi mani kakaci Rama dogu nni, Pa mani li laabaalo Beti-Afeni dogu nni, Yinba Benjamen buolu mo, yin yaa faami yi puoli po.

⁹ Fala daali yaa cua, Efrayimi buolu baa bodi. Min wangi yaala yinba Isidayeli yaaba siiga na, Baa tieni ke laa pia kuli tama.

¹⁰ Nani Juda yaaba n ŋmiagidi a biankpaana yeni, N baa teni n pabienli n jiidi bi po nani a ñingola yeni.

¹¹ Efrayimi buolu ye leni fala, Bi ŋmaadi bi moamoani, Kelima bi kuani bi yula nni Ke bi baa yaa tiini ki ŋua mi faama.

¹² N baa tua Efrayimi buolu po nani ku naabisinkuagu, Ki tua Juda buolu po mo nani li sinabiadili yeni.

¹³ Efrayimi buolu laa bi yianu, Juda buolu mo laa bi nala. Efrayimi buolu den soani a tonda Ki mia Asiiri badiciamo mi todima. Ama o bado yeni nan kan fidi ki paagi ba, O kan fidi bi nala n soangi.

¹⁴ N baa yaa tie Efrayimi buolu Leni Juda buolu po nani o yangbanlo yene. Mini n li baa dadi ki toadi toadi ba, Ki tugi ba ki yaa ban caa, Oba mo kuli kan fidi ki fie min cuo yaala.

¹⁵ N baa lebidi ki kuni ki ŋaa ba, Hali ban baa tuo bi tagili, Ki guani ki lingi nni. Bi fala nni, bi baa lingi n todima.