Ose Tili 4 - U TIENU MAAMA TILI 2013

U Tienu fu leni Isidayeli yaaba 4—13 Isidayeli tuonbiadi cuonu

¹ Cengi mani U Tienu maama, Isidayeli yaaba! U Tienu pia ti buudi leni mi diema yaaba, Kelima i moamoani ki ye, Buama ki ye, U Tienu bandima moko ki ye mi diema nni.

² Mi diema nni, se poli, janbi, Kukpama, subu leni mi conconma bebe. Yi mabindi yi lieba, Yi kpaani bi niba ki tuadi tuadi.

³ Li tie lani yaa po yo, ke li paboanli baa cuo Mi diema na yaaba, Bani leni ti moayandi Leni ti bonyugiditi kuli baa waadi. Ba mi ñincianma jami baa bodi.

U Tienu fu leni bi kopadicianba

⁴ U Tienu yedi: «Ama i jaligi n da tua yuakuli yii ka, Ban da fu leni bi niba kuli ka, Kelima n koani leni yinba bi kopadicianbe.

⁵ Yi baa yaa cuoni ki tuudi u yensiinu, N saawalipuaba, yaaba n taani leni yi mo, Baa yaa cuoni ki tuudi ku ñiagu. N baa bolini yi naa Isidayeli.

⁶ N niba bodi kelima baa pia bandima. Nani yin yie kaa bandi nni yeni, Nmoko baa yie yi, ki ñani yi, Min den puogi yi yaa tuonli yaa niinni. Nani yin sundi yi Tienu bali maama po yeni, Nmoko baa sundi yi puoliŋuani po yene.

⁷ Bi kopadicianba yabidi ki pugini, Ki tiendi n po ti tuonbiadi ki pugidi. Lani n teni ke n baa lebidi bi kpiagidi, Bi cidi n tua fe.

⁸ Bi di n niba tuonbiadi pada ki noadi. Lanwani, bi tudi n niba Ke ban yaa tiendi ti tuonbiadi ki pugidi.

⁹ Yaala n baa baa bi kopadicianba yeni, Lani, n baa nandi n niba moko. N baa waani ba fala bi bontienkaala po, N baa tuni ba ban tieni yaa biadima panpaani.

¹⁰ Bi baa yaa di ki kan guo, Bi baa yaa kpiagidi ban nua Ke yaa buli n puuni ba ti madi yeni, Ama bi kan baa bila, Kelima bi yie kaa faami mini o Diedo po, Ki puni bi yula mi conconma po.

¹¹ Mi conconma leni li dañoli lebidi bi yula.

¹² N niba caa mi lingima yaa tiidi n tie buli kani, Laa tiidi beni n bu bi po ti baadi, Kelima mi conconma yantiali teni ke bi yaadi, Ki kandi ki ŋaa mini bi Tienu, ki conbi.

¹³ Bi padi a pada a joaciama yula po, Ki siagi i buli po yaa sinma n pia u nuulumanu. Bi padi a joabila yula po leni i ticiandi tinga, Yii yaa soangu n mani. Lani n teni ke bi bisiaba tua puokpaga, Ke bi biyuamu mo conbi.

¹⁴ Ama n kan faligi yi bisiaba Kelima bi tua puokpaga po, N didi kan faligi yi biyuamu mo, Kelima bi conbi po. N li baa waani yinbe fala, Yinba yaaba n taani yi budiena puoconcona, Ki go yegi leni ba ki caa ki padi a pada. Bandi mani ke yaa nibuolu n luo yama baa bodi.

¹⁵ Ba yinba Isidayeli yaaba Yaa puni yi yula mi conconma po, Juda yaaba wani n nan da ŋoadi laa fuuli. Yin da gedi Giligali, Yin da gedi Beti-Afeni, Ki poli ki yedi: ‹Hali o Diedo yua n fo po.› »

¹⁶ Isidayeli yie nani yaa naañua n yie mi dadima yeni. Li baa gaa lede min yaa kpaa ba nani a pebila yeni, Yaa yankpaafuana n tandi kaa pia bianu yaa niinni?

¹⁷ Efrayimi buolu teni ke i buli ŋoadima loli ba, Lani yaa po, cedi ba mani.

¹⁸ Bi li baa ña li dañoli nni, ki kua mi conconma nne. Bi yudanba bua i fe ki cie ti kpiagidi.

¹⁹ Ku tafaaciangu baa fii ki pini ba, Ki tugi ba ki yaa ban caa. I fe baa cuo ba ban padi yaa pada po.