Ose Tili 3 - U TIENU MAAMA TILI 2013

Ose leni o pua

¹ O Diedo den yedi nni: «Go gedi ki ban bua yaa pua n pia li jaconconli, ki conbi. Ŋan bua o nani mini Li Miali Diedo bua Isidayeli yaaba maama. N bua ba, ba ke bi ŋaa nni ki ŋua tientoe leni bi pala kuli, ki bua ban tiendi yaa maada leni duven tiidi bonluonkaala.»

² Lanwani, n den gedi ki ban pani ŋanjilifa, piiga n kujapienamuu leni orje kilo kobiga n piimuu, ki gaa n pua.

³ N den yedi o: «Ŋan waagi ki se mini bebe yaa kani. Ŋan da go pa a yuli mi conconma po, ŋan da go ŋoadi jatoa kuli. Nmoko baa yaa tie a po yene.»

⁴ Yeni, Isidayeli yaaba baa waagi kaa pia bado, kaa pia yudanba, kaa pia pada, kaa pia butana, kaa pia bulo, kaa pia terafimi.

⁵ Li yaa puoli, bi baa lebidi ki cua ki lingi o Diedo, bi Tienu leni bi bado, Davidi puoliŋuani siiga. Bi baa faa ki guani o Diedo kani leni li fangili, ki go baa o ŋanbili.