Ose Tili 2 - U TIENU MAAMA TILI 2013

U Tienu n baa faa ki tieni o niba po yaala

¹ Isidayeli yaaba baa yabidi nani mi ñincianma balinma tanbiima, ban kan fidi ki biigi yaama, ki buali ki coadi ma. Ban den tua yaa nibuolu: «Yii go tie n niba,» Bi baa yedi ba: «Yi tie U Tienu yua n fo bijaba.»

² Lanwani, Juda yaaba leni Isidayeli yaaba go baa guani ki taani, Ki dini badiyendo. Bi baa diedi mi diema, Kelima Yisireyeli daali yeni baa tua dacianle.

³ Lanwani, yini mani yi naataanjaba “N niba” yini yi naataanpola mo “Ban bua yaaba bonŋanla.” U Tienu yedi:

Isidayeli yaaba ŋaa U Tienu

⁴ «Bu mani leni yi naa Isidayeli, Bu mani leni o, Kelima waa go tie n pua, Nmo ki go tie o calo. Wan ñani o nunga nni leni o biina siiga O conconma maalima.

⁵ Lani yaa ka, n baa yiedi o mubima, Ki ŋaa o o naa n mali o maama. N baa teni o diema n tua fanpienma, Ñima n ki ye yaa tinga nni. N baa teni wan kpe u ñuñuunu.

⁶ N kan yaa bua o bila, Kelima bi tie puoconconbila yo.

⁷ Bi naa puni o yuli mi conconma po, Wani yua n mali ba yeni, Tiendi yaala n pia i fe, Ki tua: ‹N baa yaa ŋua n jaconcona, Bani yaaba n puuni nni n jiema leni n ñima, N pekobidi leni n len, N kpama leni n daama.›

⁸ Li tie lani yaa po yo, Ke n baa pigini o sanu leni i konkoni, N baa maa u bilinu ki pigini u. O kan go le o sani.

⁹ O baa sani ki ŋoadi o jaconcona, Ama o kan nandi ba. O baa lingi ba, Ama o kan le ba. Li yaa puoli, o baa yedi: ‹To! N baa guani n cakpelo po, Kelima min den ye o kani, Li den mani nni ki cie moala.›

¹⁰ Waa den bani ke mini n puuni o ŋalikama, O duvenpaano leni mi kpama. Waa bani ke mini n den bibini o, Wan den taa yaa ŋanjilifa Leni yaa wula ki puni o bulo Baali yeni.

¹¹ Li tie lani yaa po yo, Ke n baa gaa n ŋalikama u jetaagu yogunu, Ki fie n duvenpaano duven tiidi ciema yogunu. N baa fie n pekobidi leni n len, Wan taani yaala ki piigi o ŋasiili.

¹² N baa yiedi o mubima, O jaconcona nintuali. Oba kuli kan fidi ki faabi o n nuu nni.

¹³ N baa teni yaala n bi tie o pamanli kuli n gbeni, Lani n tie a bina badi, Wan tiendi yii ŋmapaano kuli, Mi fuodima dana leni o taanciama kuli.

¹⁴ N baa bolini o duventiidi leni o kankandi, Wan maadi yii yaa maama ki tua: ‹N jaconcona n pani nni yaa panpaani n yeni.› N baa teni likani n tua fuali, Ti moayandi mo n ŋmani i tiidi yeni.

¹⁵ O baa baa wan den sundi n po, Ki padi ki siagi o bulo Baali po Leni butoe po yaa sinma n pia U nuulumanu yeni panpaani. O den sundi n po ki pili o ñoagima ki la o laani, Ki tiini ki ŋua o jaconcona. O baa pa likuli panpaani, Kelima o den sundi mini U Tienu po. Mini o Diedo n yedi yeni.»

¹⁶ U Tienu yedi: «Lanwani, n baa teni O yama n guani ki kua n niinni, Min gedini o mi fanpienma nni, Ki ban maadi o mi buama maama.

¹⁷ Lanwani, n baa guani o o duventiidi, Ki teni Akori joaloangu, N tua mi suginma buliñoabu. Lankani, o baa tuo ki yaa ŋua nni, Nani o jafandi yogunu, Nani wan den ñani Ejipiti yaa yogunu.»

¹⁸ O Diedo yedi: «Lanyogunu o baa yini nni: “N calo.” O kan go yini nni: “Baali n daano.”

¹⁹ N baa ñani o ñoabu nni Baali yela. Bi kan go tiadi ba o yela mo.

²⁰ Lanyogunu, n baa kuani o ŋantaado N niba leni ti moayandi siiga, Bani leni ti bonyugiditi siiga, Bani leni yaala n balini ki tinga po kuli siiga. N baa kua a dabana, mu jugisiemu Leni ti toatiadi kuli mi diema nni, Ki teni n niba n yaa goa ke bi jigi co.

²¹ Isidayeli yaaba, n baa yaa tie Yi togibaa yaa yogunu kuli po, N baa yaa tie yi togibaa, Ki yaa ŋua yaa bujiali n tiegi leni mi teginma. N baa yaa tie yi togibaa, Mi buama leni mi ninñingbadima nni.

²² N baa yaa tie yaa togibaa n kubi o ñoaniani, Yimo baa bandi mini o Diedo.»

²³ O Diedo yedi: «Lanyogunu, N baa tua yaa Tienu n gaani bu miabu, N baa pa tanpoli wan bua yaala, Tanpoli mo n pa ki tinga kan bua yaala,

²⁴ Ki tinga mo n pa ŋalikama, O duvenpaano leni mi kpama, Lani, mo kuli n pa Yisireyeli wan bua yaala.

²⁵ N baa buli Yisireyeli mi diema nni, Ki yaa bua Lo-Ruhama. N baa yedi Lo-Ami: “A tie n buolu.” Omo baa yini nni: “N Tienu.”»