Ose Tili 14 - U TIENU MAAMA TILI 2013

U Tienu yini o niba ke ban lebidi ki guani o kani 14

¹ U Tienu baa waani Samari yaaba fala, Kelima bi yie o. Bi yibalinba baa kpa ba leni mu jugisiemu. Bi baa ŋmaa ki midi bi biwaala, Ki lidi bi puotugupunba mo.

U Tienu baa o niba gaapo

² Isidayeli yaaba, lebidi mani ki guani O Diedo yi Tienu kani, Kelima yi tuonbiadi n teni ke yi tuudi ki baa.

³ Lebidi mani ki guani o Diedo kani Leni mi yanlebidima maama, Ki yedi o: ‹Tieni ti po sugili ti tuonbiadi kuli po, Mangi a nunga ti po, ki tuo ti miabu. Ti baa cedi tin padi a po yaa naatona yeni, Ki yaa pagi a leni ti ñoana.

⁴ Asiiri diema yaaba kan fidi ki faabi ti. Ti kan go jagini taami mo ki bua ki sani ki cia. Ti kan go yini ti nii n tagi yaala ti Tienu, Kelima a kpienbila baadi a yaa kane mi ninñingbadima.› »

⁵ O Diedo yedi: «N baa faabi ba leni bi yiema, Ki go yaa bua ba leni n pali kuli, Kelima min den pia bi po yaa pabienli gbeni.

⁶ N baa tua Isidayeli yaaba po Nani ku mangu kuugima yeni, Ke teni ban puudi nani mi puuma yeni. Bi baa toa i jiini nani Liban tiidi yeni.

⁷ Bi benkpela baa landi landi, Bi baa yaa ŋani nani olivie tiidi yeni, Bi nuulu baa yaa mani nani Liban tiidi yeni.

⁸ Bi baa guani ki cua, Bani yaaba n den ye o soangu nni, Bi baa ko ŋalikama, Bi baa puudi nani i duventiidi, Bi yela baa ña, Nani Liban diema duven yeni.

⁹ Bani Efrayimi buolu kaa go pia Ŋantaadoba kuli leni i buli. U Tienu baa pa ba ban mia yaala, Ki go yaa kubi ba. N baa yaa tie bi po nani sipre tibu, Yaabu n soangi yogunu kuli yeni. Bi baa yaa baadi bi kpaandi n yaa kane.»

¹⁰ Yua n pia mi yanfuoma, Wan gaa mi naa maama. Li yaa tie ke o nilo fani, O baa bandi mi bundima, Kelima o Diedo sani kuli tiegi. Bi niteginkaaba baa yaa cuoni i niinni, Ama bi niyiekaaba wani, Baa yaa tuudi ki baali i niinni.