Ose Tili 13 - U TIENU MAAMA TILI 2013

U Tienu n baa waani Isidayeli yaaba yaa fala

¹ Efrayimi buolu yaa den maadi, Bi niba kuli yen jie. Bi yela den kpedi Isidayeli buoli siiga. Ama bi den kua mi tudima nni, Ki padi o bulo Baali po. Lani n teni ke bi baa kpe.

² Moala, bi tiendi ti tuonbiadi ki pugidi. Bi taani bi ŋanjilifa ki duadi i buli Nani ban bili bi yama nni, Ke laa buli baa yaa tie maama. Lani kuli tie bi maaba n duadi yaale. Bi tua bi po: «Yaaba n padi bi nisaaliba Baa fidi ki gbaani ki pugi naabiga.»

³ Lani n teni ke laa niba baa bodi, Nani ku tiŋaagu yaa gbangbadigu yeni, Nani yaa manma n yoagi tonma, Nani u faalu n tugi yaa fenma, Ki foagidi leni u jalu, Nani yaa muñii n ña li diebonli kani yeni.

⁴ U Tienu yedi: «Mini n tie Li Miali Diedo yi Tienu, Hali yin den ye Ejipiti. Yii go bani kuli tientoa ke laa tie mini. Faabitoa mo ki go ye ke laa tie mini.

⁵ Mini n den kubi yi mi fanpienma nni, Taaga n ki mi yaa kaanu yeni.

⁶ Yin den kua u kaanŋamu nni, Yi den dini ki guo. Ama yin den dini ki guo yaa yogunu, Yi den gbengi yi yula, Ki sundi n po.

⁷ Lani yaa po, n den tua yi po Nani o yangbanlo yeni, Ki tua yi po yaa naamunpieno N laabi yi sanu nni ki guu.

⁸ N libi yi nani yaa fuayanbiadiga n yi Ursi, Ban cuo yaaga yaa bila yeni. N baa luodi yi bena. N baa ŋmani yi li buoli nni, Nani o yangbanñua yeni. Ti fuayandi baa dadi ki toadi toadi yi.

⁹ Isidayeli yaaba, yaala n baa teni yin bodi, Tie ke yi yie nni, Mini yua n baa fidi ki gaa yi yeni.

¹⁰ Yi den mia nni ki yedi: ‹Pa timo o bado leni bi yudanba.› Yi bado yeni nan ye le, Ki cua ki faabi yi? Yi yudanba yaaba n den baa yaa gobidi yi yeni mo te?

¹¹ N pabienli nni n den puni yi o bado, N go baa fie o n pabienli nni.

¹² Efrayimi buolu tagili diani ki bili, Bi tuonbiadi mo kan bodi hali abada.

¹³ Isidayeli buolu madi pundi, Nani yaa biga yaa naa n ye Leni u maditugukoanu yeni, Ama bi nan tie nani ki biyanpiidanga yene, Yaaga yaa maayogunu n pundi, Ke ki nan yie ke ki kan ña ki naa tugu nni.

¹⁴ Mini o Diedo, n baa faabi Laa niba bi tinkpiba yekaanu nni? Naani n baa faabidi laa niba mi kuuma nuu nni? Fini mi kuuma, a jatiadi ye le? Fini mi kuuma, waani a paalu yuu n bolindi yeni. N kan gbadi laa niba po ninñimiba kuli.

¹⁵ Efrayimi buolu n baa ki pugini Bi piama bi kpiiba siiga maama kuli, Bi yibalinba baa cua nani puoli faalu yeni, O Diedo n fiini yaa faalu, Ke u ñani mi fanpienma po. U baa teni bi ñinsani n tabi, Bi ñinbuna mo n kuodi. Bi baa fie yaala n tie bonmoanla kuli bi ŋalimano nni.