Ose Tili 12 - U TIENU MAAMA TILI 2013

Efrayimi faama

¹ U Tienu yedi: «Efrayimi buolu gaani ki lindi nni leni mi faama, Bani Isidayeli yaaba gaani ki lindi nni leni i janbi. Ama Juda diema yaaba wani da tuo Ki ŋua wani U Tienu yua n Gagidi ki ŋani.

² Efrayimi buolu ŋua ki deli u faalu, Bi tiini ki ŋua puoli faalu, Daali kuli, bi pugidi mi faama leni ki mabinga, Bi danli leni Asiiri yaaba, Ki nan tugi bi kpama ki ban kuadi Ejipiti po.»

³ O Diedo baa bu leni Juda diema yaaba moko, O baa waani Jakob buolu fala, Kelima bi bontienkaala po. O baa guani ba bi panpaani, Nani bi tuona n tie maama.

⁴ Bi yaaja Jakob den cuo o kpelo taajentindili, Hali ke bi daa ye bi naa tugu nni. Wan den beni ki dagidi joa mo, O den moani leni U Tienu.

⁵ O den moani leni maleki ki paadi o. Li yaa puoli Jakob den mua ki mia o ke wan seligi o. O Diedo den doagidi Jakob kani Beteli po, Lankane ke U Tienu maadi leni ti.

⁶ Lankane ke Tanpoli leni ki tinga Tienu, Ban yi yua o Diedo yedi:

⁷ «Lebidi ki guani mani mini yi Tienu kani, Ki yaa kubi mi buama leni mi teginma. Ki yaa dugi mini yi Tienu po yogunu kuli.»

⁸ Isidayeli yaaba, yi kubi yi nuu nni Yaa bonbiigikaala n ki tiegi, Nani Kanana yaaba yeni, Yi pala mani i janbi po.

⁹ Yi tua: «Moamoani, ti tua piada, Ki pia mi piama boncianla. Ama likuli tie ti duoli n cuani yaale. Bi kan le tagiliba kuli ti kani.»

¹⁰ Hali yin den ye Ejipiti nni, N tie Li Miali Diedo, yi Tienu. N didi go baa teni yin yaa ye yi gbandiena nni, Nani yi jaanma yogunu yeni.

¹¹ N den soani n saawalipuaba, Ki puni ba li bonlekaala boncianla, Ki go teni ke bi pua yi mi kpanjama.

¹² Ama Galaadi yaaba puni bi yula i buli ŋoadima po. Lani n teni ke bi baa bodi. Giligali yaaba moko padi a naatona i buli po, Lani yaa po, n baa teni bi padibinbina N tua tankoga i kuani nni.

¹³ Jakob den sani ki gedi Arami diema nni, O den ban kua li tuonli, kelima o pua po. O den kpaa ti yandi, kelima o pua po.

¹⁴ O Diedo den soani o saawalipualo, Ke o ban faabi Isidayeli yaaba Ejipiti po, O go den teni ke o saawalipualo yeni n gobidi ba.

¹⁵ Ama Efrayimi buolu den fiini U Tienu pali hali boncianla, Wani, bi Diedo baa tuni ba, ban wuli Yaa nimiana soama panpaani. O baa teni ke ban waani o yeli yaa fe N guani ki baa bi yula po.