Ose Tili 11 - U TIENU MAAMA TILI 2013

U Tienu buama o niba yaaba n yie o po

¹ O Diedo yedi: «N bijua Isidayeli n den paani yaa yogunu, N den bua o ki yini ki ñani o Ejipiti nni.

² Ama min den ŋua ki yi n niba, Bi den sani ki foagidi leni nni, Ki ban padi a pada o bulo Baali po, Ki siagi a dugibila ban kpie yaa buli po.

³ Mini n den bangi Efrayimi buolu li cenli, Ki muubi bi nii ke bi yaadi ki sedi, Ama bani Isidayeli yaaba, Ki faami ke mini n den kubi ba.

⁴ N den dia ba mi ninñima leni mi buama baabi, Ki tie bi po nani yua n nuadi ki biga ki tabini oba yeni. N den puuni ba li bonjekaala.

⁵ Ban yie kaa guani n kani yeni, Bi nan kan go lebidi ki gedi Ejipiti po moko, Ama Asiiri yua n baa diedi ba, ki tua bi bado.

⁶ N niba den ŋoadi bi yaa yantiana, Lani n teni ke bu toabu baa bolini bi dogi. Bu baa bolini bi bilinciami buliñoaluoditi, Ki go bolini bi dogi cain.

⁷ N niba sedi bi yiema nni ke li pa, Bi yi ba ke ban guani mini tanpoli bado kani, Ama bi siiga oba kuli ki fii.

⁸ Efrayimi buolu, n baa bili yi le? Yinba Isidayeli yaaba, Naani n baa fidi ki ŋaa yi yi yibalinba nuu nni? Naani n baa fidi ki soani yi, Nani Adima leni Tiseboyimi yaaba yeni? N pali kuli biidi, Mi ninñima cuo nni yi po.

⁹ N kan soani yi nani n pali n den beni ke n jagi maama, N kan go bolini yinba Isidayeli buolu, Kelima n tie U Tienu, mii tie nisaalo ka. N tie yaa Tienu n gagidi ki ŋani, ki ye yi siiga. N kan cua yi kani leni pabienli.

¹⁰ Bi baa ŋoadi o Diedo Yua n baa yaa duni nani o yangbanlo yeni. O baa yaa duni ki yi o bila, Ban ña hali mi ñincianma liiga, Ki jaligi ki sani ki cua.

¹¹ Bine mo baa ña Ejipiti po, Ki jaligi ki cua nani i nuani yeni, Bine mo n ña Asiiri po nani mu kpaajiemu yeni. N baa teni bikuli n guani ki kali bi diedi nni. Mini o Diedo n yedi yeni.»